Arubaanse Voetbal Bond a presenta su miembronan di directiva
Ayera anochi den Allegra Bistro situa den Courtyard by Marriott Aruba Resort a tuma luga e prome “Meet & Greet” di Arubaanse Voetbal Bond cu e miembronan di prensa. E tawata un anochi placentero unda cu President di AVB, Randolf Lacle a habri e anochi dunando un palabra di bon bini y gradici e miembronan di prensa pa nan presencia.
Lacle a introduci e seis miembronan di directiva cu Frans Dijkhoff, Rosemin Croes, Geetanjali Khemlani, Mildred Wever, Howard Hart y Albert Lake Jr. Tambe Lacle a informa cu aparte di bestuur, AVB tin su staf cu haci trabou nan diario y di cual desde januari di e aña aki Hubert Solagnier a bira e Secretario General di AVB. Randolf a introduci tambe Dyane Wiersma cu ta Women’s Football & FIFA Forward Programme Coordinator, David Abdul cu ta e Technical & Development Manager y Marvic Bermudez cu ta e Bondscoach.
E aña aki AVB a cumpli 90 aña di existencia riba 29 di januari ultimo y cu otro luna lo estrena e pelicula/documentario y tambe lo bin c’un buki conmemorativo. Tambe a informa tocante di e situacion actual di stadion/infrastructura di AVB. Fin di luna aki, Aruba su seleccion nacional lo tin nan proximo compromiso den e Copa ABCS cu ta tuma luga na Corsou den preparacion pa participa den e torneo di Nations League cu lo tuma lugar den luna di maart 2023.
Arubaanse Voetbal Bond ta contento cu e meta di e anochi a wordo alcansa y cu ta habri canal di comunicacion cu medionan di Prensa, pa asina traha hunto pa e deporte rey di Aruba cu ta futbol.