Diadomingo awo, 22 di september, Arubaanse Kunstkring ta presenta den Cas di Cultura Bassano Quartet, kende ta famoso pa e diferente tipo di fluitnan cu nan ta presenta den nan conciertonan.
Segun Clyde Harms a splica den un articulo riba e artistanan, “E fluitnan cu Quarteto Bassano ta uza ta instrumentonan impactante. Esun di mas chikito ta midi algun centimeter y e mas grandi ta yega mas di dos meter. Casi tur e instrumentonan cu e quarteto ta uza ta diseña y/of traha pa Adriana Breukink, miembro di e quarteto, basa riba e instrumentonan di siglo 16 cu e famia Bassano tabata traha na Italia den e pueblo cu ta carga nan nomber. Te hasta e sub-Contra baho di casi tres meter largo tambe ta basa riba e instrumentonan di Bassano.”
Adriana Breuking den combersacion cu 24ora.com a splica cu mayoria di e instrumentonan e Quarteto ta traha door di su persona mes. Ta papia aki di instrumentonan di periodo renaissance di siglo 15 y 16. E tipo di instrumentonan aki ta aparece den e prome parti di programa, mientras cu den e di dos ta bini cu instrumentonan mas moderno cu e mes a diseña tambe. Pues lo bini tambe cu melodianan mas moderno y romantico. Ta trata di dos mundo diferente (musica) cu ta bini hunto diadomingo.
Fluit ta bida di Breukink, kende a cuminsa construi e instrumentonan aki for di tempo cu e tabatin 15 aña y esaki a dun’e reconocemento mundial. El a enfatisa cu e ta traha instrumentonan manera blokfluit pa esnan cu ta uza esaki di un forma profesional, na un nivel halto di musica. E ta hopi interesante, el a bisa, pa scucha e combinacion di e diferente tipo di fluitnan cu nan ta uza, por ehempel esun mas chikito combina cu fluitnan mediano y esnan di 2 of 3 meter. El a lamenta cu na Aruba nop ta haci uzo general of practica cu blokfluit pasobra e ta un bunita instrumento pa haci musica cun’e. “E combinacion di uzo di bo dede y e aire musical cu e ta produci, ta masha bunita.”
Durante e ultimo 20 añanan, Adriana Breukink a traha pa haya un miho balans di e zonido di fluitnan, locual el a logra cu e fluitnan “Dream” y “Eagle” cu tin tur e rekisitonan pa mescla facilmente cu tur e instrumentonan di cualkier orkesta moderno, Harms a skirbi den un reseña.
E concierto ta diadomingo awo, pa 11’or di mainta na Cas di Cultura. E concierto ta tuma luga den e sala chikito, pa tur esnan cu ta interesa.
