Manera por corda, den luna di maart Aruba, mescos cu henter mundo a conoce un clausura historico di frontera. Despues di varios luna di evalua y monitorea e situacion y te ora cu Aruba a sinti cu ta cla a dicidi di cuminsa habri frontera den un manera gradual desde algun siman pasa cu Corsou y Boneiro.
E siman aki a toca turno na e region di Europa. Diasabra atardi dia 4 di juli Aruba a yama bonbini na e prome vuelo internacional comercial cu un total di 207 pasahero procedente di Amsterdam, Hulanda. Alrededor di 20% tawata turista cu a scoge Aruba pa nan por disfruta di nan dushi vacacion.
Tur esunnan cu a presencia e yegada di KLM a sinti un alegria y emocion enorme pasobra oficialmente por bisa cu Aruba ta atrobe “open for happiness” aunke a menciona na varios ocasion cu e reapertura lo ta sucediendo den un forma gradual y modera na comienso. Pa duna un ehempel, si den un luna Aruba normalmente tawata ricibi 25,000 turista pa luna, den juli pa e aña aki esaki lo ta rond di 7000 te cu na e momento aki.
Aruba ta tumando tur precaucion necesario pa mitiga y mantene riesgo di contagio abou y ta pa e motibo aki tin varios medida teniendo cuenta cu entre otro e hecho cu nos maneho ta basa riba 100% test, sea prome cu yegada of na yegada. Y manera anuncia recientemente e rekisito adicional cu a caba diagrega na bishitantenan cu ta biniendo di areanan di riesgo halto lo no tin opcion di haci e test na Aruba pero lo mester “upload” e resultado prome cu sali pa Aruba.
E rekisito aki lo ta aplicabel pa residentenan di e estadonan: Alabama, Arizona, Arkansas, California, Colorado, Florida, Georgia, Idaho, Iowa, Kansas, Louisiana, Mississippi, Nevada, North Carolina, Ohio, Oklahoma, Oregon, South Carolina, South Dakota, Tennessee, Texas, Utah, Wisconsin, Wyoming.
Lo sigui monitor e situacion na Merca di cerca pa evalua kico ta e pasonan cu mester tuma pa salvaguardia siguridad di nos comunidad y di nos bishitantenan. Ta di remarca cu e mercadonan principal di Aruba ta riba bon caminda y ta manehando e virus aki di un manera positivo.
A.T.A. ta gradici tur socio cu ta traha incansablemente pa turismo por habri bek. Ta subraya e responsabilidad colectivo y individual cu nos tin. Ta nos mes mester carga e responsabilidad di keda practica tur e protocolnan di higiena manera mantene distancia y laba man. E siman aki lo ta un otro momento historico ora yama bonbini na turistanan for di Merca, cu ta e mercado principal pa turismo di Aruba.
