Ultimo tempo e weekendnan ta birando un challenge pa Polis mirando tur e asistencia cu nan tin di duna pa diferente suceso. Esaki tabata e caso tambe na Linear Park unda varios patruya di Polis mester a bay cu spoed pa un pelea formal cu mester a tuma luga banda di Sandra’s Garden.
Polis a yega mesora for di diferente caminda y a topa cu un situacion caotico. Segun nos por a compronde na e sitio, un Toyota Yaris shinishi tabata trata di bandona Linear Park y dado momento ora e a dal para, el a sinti un auto dal’e di patras. E chauffeur di e Toyota a baha for di auto ora e a ripara cu e auto cu a dal e a trata di reverse pa e bay. El a bay reclama e chauffeur di e Chevrolet, pero a surgi un discusion cu e tres ocupantenan di e Chevrolet cu dado momento a transforma den un pelea unda e tres persona a ataca esun di e Toyota Yaris.
Un persona cu ni conoce esun di e Toyota a wak e inhusticia y a bin pa yuda stop e pelea. Na mes momento algun otro persona tambe a ripara y a cuminsa manda botter den direccion di e 3 ocupantenan di e Chevrolet.
Polisnan cu a yega na e sitio a separa e bringadonan for di otro y a cuminsa scucha e version di cada un envolvi. Mirando cu tur cos a start pa via di un supuesto dalmento di auto, a cuminsa inspecciona ambos auto pa wak si tin algun sla. A conseha e chauffeur di e Toyota pa e contact su seguro y pa laga nan bin na e sitio.
E chauffeur di e Chevrolet cu a cuminsa bringa, a wordo deteni y hiba warda pa Polis. Ora situacion a medio calma, polisnan a bandona e sitio pa atende cu diferente otro suceso cu tabata pasa tras di otro.
