Despues di un ronda promocional exitoso na Hulanda y Corsou, ta toca turno na Aruba pa conose e historia impactante di relata den e buki Maffia Meid, e autobiografia di Nyorka Lindeborg. Nina su historia ta fungi como un inspiracion y advertencia serio pa hobennan pa no scohe un carera den criminalidat. Apesar di un hubentud turbulento, ta remarcabel pa mira con Nina a tuma rienda di su bida y awor ta pasa su tempo papiando cu hobennan den riesgo y mamanan soltero.
Actualmente TeleCuraçao ta grabando un documentario di su bida, y e outor kier bishita Aruba fin di augustus pa presenta e buki y papia di su experencianan.
Cu diesdos aña, nan ta rank’e fo’y su padrastronan na Corsou y mande pa su mama na Hulanda, kende tabata traha como prostituta, na entre otro Arnhem, huntu cu su pareha nobo. Nan tabata terorisa y abusa di Nina sin misericordia y asina a pone e hoben huy fo’y cas. Ta sigui un bida extraordinario rondona pa droga y prostitucion na Twente, Friesland, Groningen, Amsterdam y Rotterdam.Nina ta sumergi su mes profundamente den traficacion di droga, y ta drenta den un relacion cu un di e narcotraficante di mas grandi di Hulanda, Surinam y Antias Hulandes. E ta bira un di e transportado di droga di mas importante y ta hunga un papel estelar den top di e sindikato. Cu su personalidat colorido, pa años Nina ta logra di scapa e garanan di husticia y por poko a scapa cu su bida. Al final, Nina ta bin realisa cu e bida di krimen no ta paga, y e ta keda condena na e castigu di mas haltu cu un muhe a ser condena pa un delito di droga den historia di reino hulandes.
E buki di historia di Nina ta ofrece un entrada den e mundu fasinante y violento di e sindikato di krímen ku raisnan na Antias, Surinam y Hulanda, y finalmente ta conta con ela logra sali for di e bida aki.
Co-outor Hendrik Jan Korterink ta skirbi pa entre otro Nieuwe Revu y Panorama. Anteriormente ela publica varios ‘bestsellers’ cu ta inclui Bruinsma BV, Haagse Penoze y Cor – e secuestrado di Heineken, Cor van Hout. E buki Maffia Meid tabata ‘sold out’ na tur boekhandel na Hulanda, Corsou y tambe na Aruba. Awor a drenta un carga bek y e ta obtenibel na bo boekhandel preferi.
Pa mas informacion y peticion pa entrevista, por manda un mail na [email protected]
Bishitá www.facebook.com/Maffiameid of Instagram @maffiameid
