Aruba a yama bonbini na un total di 641.763 bishitante ‘stay-over’ durante e prome 7 luna di 2018. Esaki ta 2% (+12.748 turista) mas compara cu e mesun temporada pa 2017.
Si exclui e bishitantenan di Venezuela, por mira un aumento di 6.6% (+38.102 turista) cual ta igual na un total di 619.596 bishitante pa nos isla. E cifranan ta indica crecemento den mercadonan clave pa Aruba, manera Merca, Canada, Brazil y Hulanda entre otro. Pa juli, Aruba a ricibi un total di 101.386 bishitante stay-over, cu ta 0.9% (-886) menos compara cu e mesun luna aña pasa. Excluyendo bishitantenan di Venezuela, por mira cu esaki ta 4.7% (4.368 turista) mas cu ta igual na 96.743 bishitante pa nos isla pa juli 2018.
Turismo ‘stay-over’
Aruba ta wordo representa den tres diferente continente. Compara cu juli aña pasa, pa 2018 e turismo procedente for di e continente Norte Americano a aumenta cu 4.4% (+3.086 turista/total 72.611 turista) y a trece 71.6% di total di turismo pa nos destinacion. Na juli, Merca a aumenta cu 4.6% (+3.066 turista/total 69.899 turista) y Canada a aumenta cu 0.7% (+20 turista/total 2.712 turista) compara cu e mesun luna na 2017. Di januari pa juli 2018, Norte America a trece 486.244 turista pa Aruba, cu ta un aumento di 7.5% (+33.859 turista).
E continente Latino Americano a baha cu 20.9% (-4.404 turista/total 16.697 turista) unda Venezuela a baha cu 53.1% (- 5.254 turista/total 4.643 turista) compara cu juli aña pasa. Colombia a aumenta cu 20.7% (+681 turista /total 3.975 turista) y Brazil a aumenta cu 15.2% (+247 turista/total 1.876 turista). E continente di Latino America a trece 16.5% di e total di turismo pa luna di juli na nos isla. Di januari pa juli 2018, Latino America a trece 87.448 turista pa Aruba, cu ta 20% (-21.798 turista) menos compara cu e mesun temporada aña pasa.
Pa loke ta Europa por nota cu turismo a baha cu 5.7% (-491 turista/total 8.182 turista) compara cu e mesun luna aña pasa. Reinonan Uni a baha cu 46.4% (-1.262 turista/total 1.460 turista). Manera informa anteriormente door di e asina yama ‘BREXIT’ na Inglatera, TUI a haña nan mes obliga di cancela un di e dos charternan for di e destinacion aki, pa Aruba. Por mira cu e perdida di 7.500 asiento y e caida di e mercado di Reinonan Uni ta wordo compensa cu crecemento for di otro paisnan. Mayoria di esaki ta cu e di 7 vuelo adicional pa siman di KLM cu A.T.A. a logra confirma na november aña pasa. Ademas, TUI Hulanda a subi nan cantidad di asiento pa Aruba pa asina A.T.A. Europa ta keda contribui na crecemento di turismo di calidad pa nos destinacion.
For di otro paisnan Europeo; Hulanda a aumenta cu 4.1% (+142 turista/total 3.577 turista), Alemania a keda ‘flat’ cu un aumento di 0.3% (+1 turista/total 362 turista). Sinembargo nos por mira un aumento for di Italia cu 40.6% (+277 turista/total 960 turista). E continente Europeo a representa 8.1% di turismo pa Aruba pa luna di juli. Di januari pa juli 2018, Europa a trece 46.913 turista pa Aruba, cu ta 2.9% menos (-1.420 turista) compara cu e mesun temporada aña pasa.
Turismo Crucero
Durante juli 2018, 46.370 pasaheronan crucero a bishita nos destinacion riba un total di 16 diferente barconan crucero. Compara cu luna di juli aña pasa, turismo crucero a aumenta cu 45.4% (+14.482 turista crucero): na juli 2017 Aruba a haya 31.888 bishitante for di 14 crucero. Pues 2 barco crucero mas cu aña pasa.
Di januari pa juli 2018, un total di 483.615 pasahero crucero a bishita Aruba (un aumento di 3.6% +16.590 pasahero mas) riba un total di 198 diferente crucero (un aumento di 0.5% :1 barco mas).
Tourism Receipts / Central Bank of Aruba
Di acuerdo cu Banco Central e asina yama ‘Tourism Receipts’, pa aña 2017 a contribui cu AWG 3.078.5 miyon den nos economia, cu ta un aumento di 6.5% compara cu e mesun temporada na 2016.
Hotelnan / AHATA
Segun Aruba Hotel and Tourism Association pa e luna di juli 2018, e ‘Average Daily Rate’ (ADR) a aumenta cu 15.5% compara cu juli 2017 Esaki den cifra ta US$ 216.09 na 2017 compara cu US$ 249.52 pa 2018. Di januari te cu juli 2018, ADR a subi cu 10.4% y den cifra esaki ta US$ 282.24. E entrada pa camber disponibel, e asina yama RevPAR a aumenta cu 11.8% di US$ 190.50 na juli 2017 pa US$ 213.05 na juli 2018. Pa e prome 7 luna di 2018 RevPAR a aumenta cu 12.7% – US$ 247.51
E anochinan ocupa (ORN) pa camber a baha cu 1.7% pa juli 2018. Pa e prome 7 luna di 2018 ORN a aumenta cu 1.9%.
E prome 4 luna di 2018 e cifranan di AHATA ta basa riba 14 propiedadnan incluyendo Holiday Inn Resort y mayoria di e hotelnan cu excepcion di Hilton Aruba Caribbean Resort & Casino. For di mei 2018 e cifranan ta basa riba 13 propiedad – excluyendo Holiday Inn Resort.
