Diadomingo a yega for di Colombia, nos representante na Miss Plus Universal, Jahë Bikker, despues cu diasabra anochi a tuma luga e certamen di Miss Plus Internacional, caminda cu nos representante maximo, Jahë Bikker, a sa di gana e titulo maximo.
PREPARACION
Jahë Bikker tabata tin un tempo relativamente cortico di preparacion, mirando cu na ultimo momento el a ricibi e peticion pa representa Aruba den e certamen di Miss Plus Internacional.
El a conta cu e ta un persona cu ta gusta reto y el a acepta e invitacion aki, como un reto personal pa asina demostra cu no ta importa e tempo di preparacion, pero e importancia ta pa con bo ta presenta bo mes durante e certamen.
Semper Jahë tabata involucra den e mundo di beyesa, pero patras di escenario, den preparacion di reina. Esaki ta algo cu semper el a gusta. Pero e biaha aki el a haya e oportunidad di representa su isla, e oportunidad pa briya riba su mes.
Universal Queen International ta un certamen anual cu ta busca pa destaca e beyesa den cada rincon di mundo y e gran potencial cultural di cada participante.
Universal Queen International ta un certamen anual, cu tur aña ta tuma luga na Colombia y e aña aki e tabata den su di cuater edicion y tabata tin mas di nuebe categoria.
EXPERIENCIA
Jahë a sigui conta cu semper e tabata den background di e certamennan di beyesa, semper el a gusta esey. P’e, esaki ta un elogio pa e bay representa su isla, den un otro pais, na nivel internacional y tambe pa e ta e bos pa e Plus Size Community. Pa loke ta e preparacion, esaki a bay hopi bon. Hunto cu ne, ta biahando tambe Tyrone Faro y Junior Hassel, cu ta su dos preparadonan, cu ta bay te final cu ne. Ta danki na e apoyo cu e ta ricibi di nan , siendo e motor tras di henter e preparacion pa e bay competi afo.
Jahë ta un persona c’un stimacion pa su mes asina halto, e ta stima su mes na e manera cu e ta. Dios a crea su persona manera cu e ta y awo e ta e oportunidad pa saca locual cu e tin, pa saca tur loke e tin. Beyesa no ta externo, pero e ta interno.
PREMIO
E mesun anochi di su yegada, ya caba tabata tin e prome presentacion, caminda cu el a gana cuater premio:
– miho trahe di extravaganza
– miho trahe di profesion
– Miss Actitud
– Miss Elegancia.
Su reto di mas grandi durante e concurso tabata e anochi di concurso, unda cu e mester a contesta un pregunta pero cu Spaño no tabata su prome lenguahe.
Pero e ta un persona cu ta kere firmemente cu loke bo ta proyecta, ta yuda bo tambe na momento di puntuacion.
MENSAHE
Nunca exclui bo mes for di e mundo eyfo, ya cu beyesa ta locual cu bo ta papia, locual bo ta sinti, pensa, e no ta den loke bo ta bisti ni tampoco den e size di bo paña.
PLAN PA FUTURO
Pa loke ta proximo eventonan, Jahë a bisa di ta tuma un break chikito, pero si el a pidi pa keda pendiente, ya cu e tin hopi mas na caminda.
Por ultimo el a gradici tur esunnan cu di un of otro manera a yud’e den e trayecto aki di Miss Plus Universe. Sin lubida su preparadonan, Tyrone Farro y Junior Hassel. Su famia cu tabata ta un apoyo grandi aki na Aruba.
El a gradici tambe Alexander Pineido y Frank cu ta e directornan di Universal Queen International pa e bunita experiencia aki.
