Dia 7 di november tin sentencia den un caso den Corte unda cu Aruba Birdlife Conservation a cuminsa pa haya un ordo cu no por otorga tereno na un area banda di Bubali Plas cu den nan opinion ta cay den un area berde.
Ta trata di un area conoci como “Warbler Street” net na e otro banda di caminda di e hotel Phoenix. Den area aki tin tres espacio (tereno) cu a keda otorga door di e Minister encarga cu infrastructura den e Gobernacion anterior. Nan a keda duna na momento cu ya caba e Gobernacion tabata cabando.
Ya caba ABC a bay Corte pa e prome tereno unda cu Corte a dicidi cu e espacio no. 1 no por wordo uza pa desaroyo di proyectonan hotelero of condominium pa motibo cu e ta cay den un area berde. Den e caso aki, e Minister nobo di Infrastructura a para banda di e fundacion ABC y a bisa cu nan tambe ta kere cu e area aki no por bay pa desaroyo di proyectonan manera ariba menciona.
Sinembargo e compania aki (Mahogany) cu a ricibi e opcion, a keda insisti cu e tin derecho pasobra e tin opcion. Pero tambe a bisa cu e area en cuestion no ta cay den “Groen Gebied”. Corte a manda pidi pa trece expertonan cu ta mustra cu esaki ta e caso. Asina esun cu a haya e tereno a trece e experto cu a traha un rapport p’e, kende tabata sr. Robert Kip, kende pa casualidad a traha pa e Minister anterior encarga cu Infrastructura. El a presenta algun mapa cu delineacion, unda por mira te unda e area berde ta yega y unda e parti habri pa desaroyo turistico ta yega. E linea unda cu tabata area berde a wordo hala atras, cu a haci cu e pida tereno ey a cay awo den area turistico. Sinembargo por a compronde, cu ya for di e tempo aya caba, a pone cu e demarcacion no ta cuadra y cu esaki ta bay cambia. E unico fuente di e experto Kip tabata e mapanan cu el a copia for di Departamento di Infrastructura y Planificacion.
Abogado di ABC, mr. Rep, a splica ampliamente tur e trabou cu nan a bon ta haciendo pa proteccion di e area berde aki di Bubali Plas y pakico. Ya caba Corte a dicta veredicto a fabor di e prome plot bisando cu esaki no por wordo desaroya. Pa ABC, nan kier preveni e menasa di mas construccion den un area unda parhanan internacional tin nan cas. E ta wordo considera un “Important Bird Area” (“IBA”) cu awor ta bou menasa.
Nan a splica cu tin 176 especie di parha registra na Bubali y “Warbler Street” ta conoci como un sanctuario di parhanan y ta situa net entre e proyecto gigantesco di Embassy Suites, cu tin hopi zonido di construccion aworaki y ta molester pa parhanan, y e Butterfly Farm. Den e corridor ey amantenan di naturalesa a constata of a señala 89 especie di parha.
Den Corte a mustra Hues diferente potretnan saca cu drone y cu ta demostra con hopi daño a causa caba na Bubali Plas. P’esey Aruba Birdlife Conservation ta lucha pa preveni cu mas daño ta wordo causa den e area importante aki. Bubali Plas ta un di e 16 areanan di naturalesa cu a wordo aproba den forma unanimamente den Parlamento, pa wordo protegi. Y cu ta nifica cu e lo wordo poni bou di maneho di Fundacion Parke Nacional Aruba. Den Corte a bini dilanti cu mas cu 12 mil persona a firma un peticion pa recorda Gobierno pa implementa e decision aki tuma door di Parlamento.
Den un comentario poni riba Facebook, e fundacion ABC ta bisa cu te dia di awe ningun Gobierno a cumpli cu e plan pa pone Bubali Plas bou di cuido y maneho di Parke Nacional di Aruba. Pero cu nan lo sigui lucha pa e 16 areanan aki wordo poni bou di PNA.
Nan a recorda cu esaki ta di 4 caso den corte pa e area conoci como “Warbler Street Area”, pero total tabata 15 biaha cu nan a bay Corte pa protege diferente area na Bubali di wordo desaroya cu mas hotel, condominium, centro comercial of otro proyectonan. Banda di e caso aki, ABC ta bisa cu nan tin dos otro caso mas andando den Corte cu ta relaciona cu Bubali Plas.
