Tio Ali ta di bishita cerca e muchanan di Aruba. Locual Tio Ali ta haci e ta yama: “Entretené pa Eduká”. Pues Tio Ali ta haci cos leuk cu muchanan pa siña nan algo. Anto pa haci esey Tio Ali ta uza verso cu ta Rima, Ritmo, zonido y Movemento. Pues Tio Ali ta usa verso den cua tur palabra ta caba cu e mesun zonido. Por ehempel Raton, Balvon, Carson, Diaranson, Colon. Pues “Compa raton, ta sinta den balcon, ta laba su carson, p’e haya/bisti diaranson”.
Despues Tio Ali ta papia e palabranan ey cu hopi zjeito y den ritmo pa asina e bira ritmico. Anto banda di e zonido di su bos Tio Ali ta pone zonido di un instrumento cu yama Tambu. Esey ta pone e piesa haya e nomber Poesia ritmico. Tio Ali a pone movemento hunto cu e ritmo. No movemento djis pa baila, pero movemento pa e mucha por haci loke e ta bisando den e poesia ritmico. Esey ta yuda cu e mucha ta siña loke Tio Ali trece mas lihe.
Biblioteca Nacional Aruba ta organisa su Festival di Buki pa mucha pa stimula mucha pa lesa y lanta nan interes pa storia y informacion riba mil y un topico. Diferente autor di buki y ilustrado ta bishita scol pa stimula mucha pa lesa.
Clausura di e festival lo ta na Prinses Amalia Basisschool dia 8 di november pa 6or. Tur mucha ta bon bini y entrada ta gratis.
