“Awe mainta nos a constata cu algun cliente a descubri cobransa no autorisa riba nan tarheta di debito. E incidente ta wordo investiga y ta den man di e departamento corespondiente. Tur cliente afecta lo wordo contacta y banco lo debolbe e suma en cuestion na cada un debidamente. Segun mas informacion ta disponibel nos lo comunica esaki”, asina Aruba Bank a informa un rato pasa den un comunicado di prensa. E prome banco comercial di Aruba, funda na 1925, awe ta bou presion enorme, despues cu ta parce cu su sistema ta comprometi y posiblemente “hackers” a apodera di cuenta di cliente, sin cu nan por garantisa ainda di tin e situacion bou di control.
Clientenan cu a nota transferencianan saliendo di nan cuenta sin cu nan a haci esaki of a autorisa esaki, a yama banco mesora. Mayoria no por a haya banco na liña y den panico a ranca bay e banco personalmente pa pone nan mes na altura di kico ta pasando cu nan cuenta. For di banco nan a haya comunicacion cu lo investiga y posiblemente debolbe e placa bek den dos luna di tempo. Claro, esaki a cay den masha mal tera cerca e clientenan di banco, pasobra di mes e situacion financiero di hopi ta precario y pa banco permiti cu otro hende ta haya acceso di forma ilegal na cuentanan priva, haci transferencia y awo mester warda simannan largo pa haya bo placa bek, ta bira un problema serio!
Lunas sin carchi debito of credito
Di otro banda, siendo un di e banconan mas grandi di nos isla, Aruba Bank tin lunanan largo caba cu un problema serio di falta di “chip” pa bay riba nan carchinan. Consecuentemente, si bo carchi debito of credito vence, nan no por reemplas’e cu un otro. Mescos cu si nan hack bo carchi, normalmente den un of dos siman, ta cambia bo carchi pa un nobo. Esey no ta sosode mas for di algun luna caba pasobra cu segun nan, tin un scarsedad mundial di chip. Esey a hala hopi atencion pasobra clientenan di otro banco na Aruba si tin acceso na carchi y chip! A manda carta pa cliente cu na september lo a regla e problema aki, pero awo na october ainda clientenan ta cana cu carchi venci, sin por haci compras online of ora biaha pa exterior.
Clientenan ta rabia
Durante transmicion for di Aruba Bank un rato pasa, a nota cu varios usuario di 24ora.com a comenta cu specialmente anochi y marduga a nota transferencia riba nan cuenta. Nan tin problema pa e forma con e banco no a proteha nan placa y e silencio di Asociacion di Banconan (ABA) y di Banco Central di Aruba tambe ta cuestionabel. “Boso mester atende cu hopi mas cautela cu placa di hende”, asina un di e clientenan a comenta, demostrando un disgusto grandi pa e nivel di servicio.
A cambia director e aña aki
Aruba Bank tabata den noticia caba e aña aki, ora cu na april a kita nan director, Peter Staal, for di trabou debi na stuur auto burachi. Na augustus nan a apunta Elisabeth “Els” Avontuur den e funcion di director general y presenta di e hunta di directiva di e banco. E ultimo aki tin mas cu 25 aña di experencia den sector bancario na Hulanda y China. Hunto cu e bankero Rubiano, Sharon Fränkel-de Cuba, nan dos mester dirigi e banco y hib’e na e siguiente nivel di crecemento.
Aruba Bank ta e prome banco y esun mas grandi di Aruba
Aruba Bank ta e banco comercial mas grandi di Aruba, cu riba 2 biyon florin na activo. El a nace na Aruba na aña 1925 como John G. Eman Banking Department. Shete aña despues el a bira John G. Eman Bank N.V. y desde aña 1936, despues di a unico cu un otro banco, a forma hunto loke nos conoce awe como Aruba Bank. Nan tin un total di tres sucursal na Aruba awe, cu mas di 30 mashin di ATM y cu riba 260 empleado. Na october 2003, Aruba Bank a cumpra e accionnan di Interbank Aruba N.V. y na februari 2005 a cumpra OHRA Hypotheekbank. Mester menciona cu Orco Group, un compania estableci na Corsou, ta doño di Aruba Bank. Ocro Bank a habri na Sint Maarten na aña 2007 y despues na Boneiro na aña 2009. Nan tin acuerdo y ta traha hunto cu varios banco internacional, manera Wells Fargo na Miami, ING Bank na Belgica y Bank of America na Merca.
