Na luna di mei 2021 gobierno a ricibi un e-mail anonimo informando cu cos no ta bayendo bon den Arubahuis. Prome minister ta insisti cu el a laga haci investigacion riba Arubahuis, pero e investigacion ainda ta tumando luga.
Durante conferencia di prensa Prome Minister mr. Evelyn Wever-Croes a indica di conoce e e-mail aki, a ricibi esey como tambe e denuncianan. El a pidi pa haci un investigacion riba Arubahuis y esun cu a manda e e-mail cu a resulta di ta parti di e investigacion, tambe ta parti di esey.
Segun e mandatario, el a bisa hopi biaha cu e mes a pidi p’e investigacion y asina cu tur cos ta cla rond di dje, e lo presenta esey na parlamento como henter comunidad di Aruba. Un biaha mas e ta enfatisa cu e investigacion ta den proceso y e cosnan asina por tarda.
E ta haya cu simplemente pa purba daña su nomber, tin politico cu ta purba daña un investigacion asina importante. “Ora cu politico oponente denuncia cos, exigi rapport, exigi investigacion, manera mi a bisa desde hopi siman pasa, bo ta daña e investigacion”, tabata palabra di Wever-Croes. El a sigui bisa “ora bo ta insisti tanto asina pa publica cosnan, documento cu no ta cla ainda pa publica bo ta daña investigacion.”
STATUS DI AMBTENAAR
Cu si nan ta bay entrega un keho contra ex-minister plenipotenciario Guillfred Besaril, prome minister a indica cu Besaril a tuma su retiro fo’i e funcion aki. Como cu un parlamentario of minister tuma su retiro, e tin un aña di overbruggingstoelage y Besaril ta den e periodo ey awo. E mandatario a sigui splica cu e ta un ambtenaar prome cu el a drenta politica, kiermen e tin su trabou den gobierno.
INVESTIGACION
E mandatario a splica cu e investigacion di Arubahuis no ta riba Guilfred Besaril, pero kico tur ta e cosnan cu a bay menos bon. Den e investigacion aki no ta un persona so ta investigando, pero mas hende.
Segun Wever-Croes, e no por bisa ainda si nan ta bay entrega keho contra Guillfred Besaril, pasobra hustamente esey ta loke e investigacion ta bay duna. E investigacion ta uno administrativo. Unabes tur cos ta cla y e haya e consehonan riba su lessenaar, segun e mandatario, esakinan lo indica cu mester haci tal cos y bay cerca tal persona. Eynan e lo indica si nan mester bay Ministerio Publico. Tambe el a indica di consulta cu Ministerio Publico p’asina e departamento aki por ta na altura, pero awo no tin ningun indicacion di esey.
