E di dos edicion di ABC Beach Tennis Cup a tuma luga recientemente na Boneiro. E evento deportivo a hala atencion di hopi tenista di cada isla pa bataya riba beach representando nan isla.
Cu un participacion di 80 ekipo y 160 hungado registra, e tabata un torneo completamente yen. E tabata forma parti di Bonaire International Sports Week, y durante cual atletanan a logra haya diferente medaya di oro, mustrando e dominio den deporte. Entre e categorianan conkista, Aruba a sobresali principalmente den divisionnan Avansa (hende homber y hende muhe) como tambe den Open Women.
Den e categoria sumamente competitivo Open Women (e nivel di mas halto) a sobresali Maria Buuts y Eugemine Ignacio, di Aruba, sigurando medayanan di oro, cu un actuacion resaltante durante un wega intensivo y hopi preta contra Farah Mesbahi y Inge Vos di Boneiro.
Den categoria avansa masculino, Anderson Giel y Amaro Maduro a mustra nan habilidadnan excepcional y determinacion pa bay cu e victoria.
E final den categoria Advance Women tabatin un final Arubano, cu Jenna El Qualkadi y Rixt Kramer finalisando como ganado mientras cu Yentl Lieuw y Jacomien Aleman a representa Aruba como finalista, mustrando asina e dominio di Aruba den ABC Cup.
E torneo anual tambe a duna indicacion di un crecemento di e nivel di beach tennis riba cada un di e islanan y e resultadonan ta visibel den e categoria Open Men cu tabata un final Boneriano hunga door di Jerry Lomp y Sigrel Burnet contra e campeonnan Tim Eikholt y Joeri van Bon.
E torneo tabata un bon oportunidad pa hungadonan di e islanan bini hunto, disfruta di deporte y conecta cu otro.
Aruba Open Beach Tennis Championships, cu ta tuma luga den luna di november na Bushiri Beach, ta un di e otro eventonan grandi di beach tennis atrayendo atletanan di rond mundo. Boneiro ta participa normalmente cu rond di 50 hungado y e tabata un bon oportunidad pa e teamnan di Aruba debolbe e cortesia participando den e ABC Cup.
Mirando e actuacion impresionante durante fin di siman na Boneiro, Marc Kiezebrink di Beach Tennis Aruba a bisa cu e ta sumamente orguyoso di logro di e atletanan, cual exito ta debi na nan dedicacion y trabou duro. El a enfatisa e popularidad creciente di beach tennis rond mundo y riba e islanan ABC.
Pa mas informacion riba beach tennbis subi riba www.beachtennisaruba.com
