Otmar Oduber di plataforma PAIS ta cuestiona unda e bintiun miembronan di parlamento ta pa para dilanti di Dump Parkietenbos pa puntra gobierno di Aruba kico ta pasando cu henter e bario. “Aki no ta un famia, un grupito cu ta vota pa bo. Aki ta barionan tur rond di Parkietenbos pasando den un pena pa añas,” segun Oduber.
E tempo ey a scoge pa no bin cu incenirator pasobra a dicidi cu lo transporta sushi pa Colombia. Awe seis aña despues por mira cu ni un bari di sushi a keda transporta for di Aruba. A taha e tempo ey cu esaki lo bira contra ley pa exporta of importa sushi. For di tres aña caba na Colombia a pasa ley cu ta prohibi entrada di sushi anto awe nos ta den e situacion cu nos ta na Aruba pa falta di curashi,” segun Oduber.
“Unda nos miembronan di parlamento ta pa cuestiona? No ta cuestion di sostene of opone un gobierno, e cuestion ta pa atende cu e problema aki.”
Oduber a señala tambe riba e situacion di Bubali Plas caminda ta contaminando henter e lama, unda tin boshi coral morto y no ta treciendo cambio, mas bien solucionnan facil. E problema keto bay ta sigui na Bubali y lo sigui durante e proximo añanan pasobra e mandatario encarga ta incapaz di soluciona e problema, segun Oduber.
Ningun parlamentario ta papia riba e temanan aki pasobra aparentemente e no lo ta popular pa papia riba dje, siendo cu PAHO (Pan American Health Organization) cinco aña pasa a mustra riba e epidemia cu por bini pa medio di e sushi riba Parkietenbos. Awor a move cos pa Ser’i Teishi y awa sushi ta bay tur rond di Aruba. “E solucion di e minister responsabel pa medio ambiente ta pa parti esaki den tur bario, y hiba e desaster di Parkietenbos den tur bario na Aruba.”
