Examennan final no ta sigui. Minister Arie Slob (Enseñansa) di Hulanda a keda di haci e anuncio. Y un rato pasa a bira conoci cu esnan di Aruba tambe. E ta un decision tuma awe den oranan di merdia y cu riba facebook Parlamentario Edgard Vrolijk a anuncie.
Slob ta haci anuncia di kico mester pasa cu examennan. Nan ta bisa cu awo cu e scolnan lo ta cera sigur te cu 6 di april, e studiantenan no por prepara nan mes bon pa e examennan. Anteriormente a menciona cu ta trahando riba diferente escenario por si acaso cu e examennan final no por sigui. E mandatario a expresa cu e no kier warda te cu 6 di april – ultimo fecha riba cual mester tuma un decision – y duna e scolnan claridad for di awo.
Esaki ta nifica cu studiantenan na Hulanda lo no finalisa nan examen final di e forma normal, pero e lo no nifica cu nan mester haci e aña completamente di nobo.
Un opcion ta pa e cifranan di SO, conta como cifra final. E problema ta cu no ta tur scol a caba cu e fase aki ainda.
Aruba
E ta un situacion similar cu na Aruba. Scolnan secundario manera MAVO y HAVO ta haci cuatro SO pa aña y na final tin e examen final cu ta bini di Hulanda. E ultimo aki ta conta pisa pa e puntuacion final.
Na momento cu e crisis a surgi tabata net ora cu tabata preparando pa e ultimo SO, cu mester tuma luga awo. Inclusive tin scol cu a cuminsa cu e SO e siman aki tumando tur medida di precaucion y teniendo cuenta cu “social distancing”.
A chek cu diferente organisacion local,cu a informa cu nan ta pendiente kico Minister di Enseñansa ta bay haci. Informacionnan ricibi un rato pasa ta indica cu a dicidi pa sigui e decision di Hulanda pa para e examen final, cu ta hay’e for di Hulanda tambe. El a basa su mes riba consehonan ricibi di su conseheronan.
Scolnan di Aruba ta depende di e examennan di Hulanda pa sigura neutralidad.
Na Hulanda e mandatario mientrastanto a manda un carta pa Tweede Kamer unda ta informa nan cu e examen central ta cancela pa e aña escolar aki y cu studiantenan por haya nan diploma basa riba resultadonan di nan SO. Di e forma aki scolnan ta haya mas tempo pa prepara e SO-nan final y pa haci esaki di distancia. Si scolnan tin e espacio adecuado por haci esaki na scol.
