Durante tratamento di presupuesto Parlametario di partido POR Sr. Allan Howell a entrega un mocion pa asina pidi tur Parlamentario y Minister pa entrega 1000 florin durante e sigiente 3 luna. E suma aki lo ta for di nan salario mensual.
Sinembargo e mocion no a cay den bon tera serca varios persona incluyendo e fraccion di partido MEP. Sr. Howell a indica cu E ta considera e situacion actual uno unico unda tur mester mustra nan responsabilidad y sosten, incluyendo parlamentarionan y ministernan. Teniendo na cuenta e situacion den cual nos pais ta aden, ta considera importante pa rond af e reunion di presupuesto pasobra no tin mucho ora pa discuti riba dje. “Mundo ta den crisis, nos pais ta den crisis. Parlamento y Gobierno mester sa di tuma e miho decisionnan pa salud dinos hendenan pa nos salba nos pais”.
Segun Fraccion di MEP e mocion aki ta uno populista pa cual nan no ta bay forma parti di dje. Hopi ciudadano tambe a remarca riba rednan social cu mocion aki no lo yuda cu nada. Hopi ta di opinion cu e suma mester ta mas hopi mirando cu e miembronan di Parlamento y Ministernan ta gana riba 10.000 florin. Tambe hopi ta di opinion cu e Parlamentarionan y Ministernan mester gasta nan tempo pa bin cu solucionan na nivel ‘macro’ esta decir bin cu solucionan cu por resulta den sumanan cuantioso pa yuda e ciudadonan cu a perde entrada.
