A sali for di afo algun dia pasa, cu e minister di enseñansa nobo lo bay privatisa e Departamento di Scolnan Publico. Segun parlamentario Arthur Dowers, a purba di haya informacion kico ta e motivacion di e minister y kico ta e argumentacion, kico ta e documentacion cu tin na e momentonan aki. Kico ta e partinan pa loke ta trata mehoracion di calidad di enseñansa y mehoracion di calidad di cuido di maestronan. Tin cu agrega cu lamentablemente, e minister no por presenta esaki te na e momentonan aki. E minister no tin un plan traha na e momentonan aki ainda. E no tin un plan van aanpak y tampoco ta asina cu el a pensa riba e beneficionan pa loke ta enseñansa.
Logicamente na momento cu bo kier cambia e posicion huridico di trahado, e prome yama pa papia riba esey, ta trahado y sindicato. No ta asina cu ta bula dilanti di sindicatonan pa strobanan haci nan trabao na momento cu bay tin un dialogo cu Gobierno. Loke si tin di compronde como miembronan di parlamento, cu e minister aki no tin ningun intencion pa hiba ningun dialogo cu ningun sindicato of personal di enseñansa, pasobra cu den su pensamento, e ta minister. El a pone esaki den su programa di gobernacion. Pesey partido MEP a pon’e den Gobierno pasobra nan kier di get rid di hopi maestro for di e aparato gubernamental. Pa e motibo ey a uza Rudy Lampe pa haci e trabao aki pa nan.
Tin di compronde cu Lampe tin un trauma y cu e ta basa riba algo cu lo a pasa cun’e y a hinca den su cabes. E impresion di Dowers ta, cu e ta gaña, pero ta bay purba di saca un poco mas informacion si por ta un hende lo a gaña Rudy Lampe esaki. E ta cana tur caminda bisando cu e ta bay privatisa DPS, pasobra un biaha el a bay solicita na Universidad di Aruba. E lo tabata e miho cantidato pa e funcion y despues cu el a haci e procedura di solicitut, nan lo a neng’e e trabao bisando cu ta e minister di enseñansa lo a neng’e e trabao. Arthur Dowers e tempo ey tabata minister di enseñansa y tin cu bisa cu Dowers no a mira ningun momento un discusion hiba riba nombracion di Rudy Lampe ningun caminda. Rudy Lampe ta hibando den su cabes of trece p’afo, cu Universidad lo a keda sin nombr’e, pasobra a persigui’e politicamente. No tabata tin ningun rason pa persigui’e politicamente, pasobra Rudy Lampe tabata miembro di parlamento hunto cu Dowers. E tempo ey Lampe a hiba su politica den parlamento. No tur ora tabata di acuerdo cun’e, pero no tabata tin ningun rason pa bay persigui Rudy Lampe. Nan no a persigui ningun hende politicamente.
‘E cos mas pret ta, cu si ta un profesional cu ta cumpli cu e rekisitonan stipula den ley y den e descripcion di funcion na Universidad of cualkier otro facilidad di enseñansa, e persona ta keda nombra.
Por corda un of dos cu tabata tin comportacion malo cu ta bay den direccion di acto di pedofilia y e docentenan ey a keda sin wordo nombra den enseñansa, tempo cu Dowers tabata minister.
No por corda ningun otro persona cu a wordo nenga un trabao, pasobra e lo tabata vincula cu cualkier partido.
