Siguridad, criminalidad ta preocupa tur hende y den e gobernacion di AVP e no tabata un excepcion tampoco. Mientras tanto por a mira cu a grita hopi pa helicopter.
Helicopter a bin pero mientras tanto criminalidad tey keto bay. Dos atraco uno tras di otro. Dos atraco riba oficinanan, supermercado, etc. Parlamentario Arthur Dowers ta sigui e asunto aki di cerca.
Durante gobernacion di AVP, tabata tin helicopter y dado momento algo a bay fout cu e bid y nan a pidi mas placa tambe pa e helicopter. No tabata tin esey presupuesta. Tabata bao di un situacion financiero hopi preta y mester a maneha hopi bon mes e placa. Mester a percura tambe pa e prioridadnan wordo poni caminda cu e mester a wordo poni. Por a mira dado momento cu a logra pa mayoria cos den Cuerpo Policial funciona optimal. Ta contento cu nan a admiti esey tambe. E gobierno aki a bin ta gaba nos Cuerpo Policial y por mira cu tur loke e gobierno anterior a haci na trabao, ta wordo continua y ta dunando su frutonan tambe.
Loke ta tristo si cu por a mira un atake frontal di parti di e gobierno contra Cuerpo Policial, caminda cu diferente polis a wordo completamente desarma. Tabata tin varios polis cu a wordo kita for di cierto departamentonan. Otronan a wordo cera, otronan a wordo acusa. A kibra e moral di Cuerpo Policial y a fortifica e posicion di e criminalnan. Esey ta hopi cla cu a tuma luga den e ultimo periodonan aki. Dios gracia cu e trabao cu AVP a haci a duna hopi fruto cu ainda ta sinti e efecto di e trabao aki. E gobierno aki a admiti esaki den Parlamento.
E discusion di e helicopter no ta bay den dje pa nan, pasobra a mira cu Andin Bikker ta sumamente feliz. E ta manera un mucha chikito cu a haya su prome coy hunga, asina contento por a wak’e dia cu nan a logra via di nan oficina. Pasobr ta su partner di oficina a bay busca e helicopter. Dowers no kier kita e felicidad ey cu nan tabata tin un rato. Pero si bisa cu e helicopter aki ta preveni cierto cosnan, experiencia ta cu e helicopter aki tabata wordo uza hopi pa loke ta bringamento di plantacion di marihuana. Dowers ta spera y ta contento cu nan lo sigui haci esey severamente. Tin di compronde cu nan ta pro marihuana, pero parce cu tin un grupo cu no ta pro pasobra nan ta bay bringa marihuana.
Esey ta algo positivo di esaki. Pero pa loke ta atraco, crimen, hende muhenan cu ta wordo mata den nan cas, muchanan ta wordo abusa. E crimennan mas pisa den sociedad, helicopter no ta traha ni pa previnie, ni pa combati’e, ni pa par’e.
Loke ta para crimen pisa den e pais, esey ta cientificamente proba, ta aumenta e efectividad di e Cuerpo. Esey a haci grandemente. Por a mira cu cada biaha crimen tuma luga, algun rato despues ta detene esnan cu a comete e crimen. Esey ta e instrumento mas valioso pa preveni crimen. Castigo halto tampoco ta baha crimen. E por preveni cu e mesun criminal pa comete un siguiente crimen si e keda hopi tempo cera. Esey no ta spant’e. Pasobra ningun hende cu ta bay comete un crimen no ta bay pensa cu tin 10 aña riba dje. Nan ta bay pensa ta con grandi e chens ta cu nan por gar’e.
Si e Cuerpo ta efectivo manera Cuerpo Policial, un cuerpo respeta, un cuerpo cu ta haya reconocimento door di coalicion y hasta internacional, ta haci cu por bringa. Esey ta logrando grandemente na e momento nan aki. Ta spera cu nan por wanta e pace cu nan tin eynan. Esey no tin nada di haber cu e trabao cu e minister aki a haci. E minister aki no a haci nada. E minister aki no ta compronde kico su trabao ta. E parti di mas tristo ta cu e minister no tin e curashi tampoco pa tuma e pasonan cu mester wordo tuma ora bo ta un minister di husticia y esey ta wordo demostra tur dia. E helicopter, lamentablemente ta costa hopi mas placa na e momentonan aki cu e tempo di AVP. Henter e esfera rond di e helicopter ta na e momentonan aki ta cu tabata un deal pa cierto hendenan haya placa. No tabata algo dirigi riba proteccion di e pueblo.
Principalmente tabata pa un grupito gana placa. Ta spera cu nan ta satisfecho cu e placa cu nan haya den nan saco. Dowers no ta kere cu lo duna efecto riba e crimennan cu ta afectando nos comunidad, cu lo para e crimennan aki.
E no lo bay soluciona e crimennan ey tampoco. Loke tin cu haci ta inverti grandemente den cuerpo, den bo hendenan, haci nan fuerte suficiente pa nan por actua na momento cu un hende kier comete un crimen of un hende caba di comete un crimen. Ta tende hende ta bisa cu na varios ocasion arestatie team ta cerca. No ta arestatie team. Ta un team special cu yama Rapid Response Team, cu a wordo crea den tempo di Dowers, cu tabata reacciona masha lihe mes ora cu cierto crimennan tuma luga y ta mira cu nan ta para cierto cosnan. Ta yama pret cu tin hendenan cu ta forma parti di e gobierno cu no ni sa e nomber di e team aki. Asina ey hopi otro team a wordo crea, hopi cos a wordo haci, cu ta dunando nan fruto awe y ta spera cu e gobierno aki no desmantela henter e cuerpo aki, Dowers a enfatisa.
