Corte Superior a aumenta castigo pa atracadonan

Ministerio Publico a haya rason den e caso den e castigo cu nan a bisa cu mester wordo impone riba esnan envolvi den e atraco cometi riba Joyeria la Estrella na januari 2017. Den Prome Instancia, Fiscal a pidi mas castigo pa Adalberto Osbert Fingal; Billy Bikker y Eduard Marcano Gonzalez. Ni e acusadonan ni Fiscal no a keda contento cu e castigo impone y a apela e sentencia, unda cu el a wordo trata door di tres Hues luna pasa y e siman aki decision a cay.

E acusado Eduard Marcano Gonzalez ta cera for di basta luna caba den un prizon di siguridad halto na Hulanda, ya cu a haya informacion cu e tabata planeando pa huy. Mesora a dicidi di mand’e Hulanda. El a haya sa di e sentencia nobo via di un video call, unda cu riba un pantaya grandi por a mira e acusado y e tabata mira sala di Corte na Aruba.

E acusado Billy Bikker tampoco tabata kier a presenta den Corte pa scucha su sentencia. Osberth Fingal si tabata presente.

E atraco aki y tambe esun di Gems den cual Bikker tabata envolvi, a tuma luga na un forma profesional y organisa. A tene cuenta cu e empleadonan a wordo menasa y a bay cu joyanan cu balor di mas di mey miyon dollar. Cu e acto aki, e atracadonan a crea hopi miedo cerca nan y probablemente lo keda cu e trauma aki pa basta tempo.

Tambe nan a crea incertidumbre pa loke ta e siguridad pa Aruba cu ta conoci como un isla relativamente sigur y miedo bou di e pueblo cu nan acto. “Boso a causa un daño na imagen di Aruba, cu ta afecta turismo y economia di e isla.” Pues ta trata di delitonan serio cu no por keda sin wordo castiga. Y e circumstancianan personal no ta cambia nada den esaki. Den e caso di Bikker, el a comete un delito similar caba y no a demostra cu el a compronde di a comete algo fout.

Den e caso di e Venezolano Marcano, a tene na consideracion cu el a coopera cu autoridadnan y a yuda trece claridad den e caso. Teniendo cuenta cu esey, a impone un castigo di 8 aña. Den prome instancia el a haya 6 aña y mey. Pa Osberth Fingal e castigo a keda mescos, esta 9 aña, considera esun cu a bin cu e plan hunto cu su amigo Billy Bikker. E ultimo aki den Prome Instancia a wordo condena na dos aña y mei y awor Hof a impone cinco aña riba dje. Si wak bon, e castigonan cu Hof a impone ta loke cu Ministerio Publico a demanda den prome instancia pero Corte no a bay di acuerdo cu nan.

Comments

comments