Arte di Palabra ta un competencia pa hoben den literatura na Papiamento, den declama poesia, conta cuenta y storia cortico pa scolnan secundario. Segun director di Departamento di Cultura, Siegfried Dumfries, e aña aki ta e di 10 edicion di Arte di Palabra Aruba y den cuadro di 40 aña di existencia como Departamento di Cultura y tambe 15 aña di oficialisacion di Papiamento, a dicidi pa tene of ta anfitrion di e competencia di palabra ABC na Aruba. E ta un competencia hopi importante den literatura y e cooperacion pa cu Aruba, Boneiro y Corsou, ta un cooperacion di bon fuente, bon structura. Tin un bon contacto cu Corsou y tambe cu Boneiro. Mirando e celebracionnan cu nan tin e aña aki, a dicidi pa ta anfitrion aki na Aruba, pa prome biaha, den e di 10 aña di existencia di Arte di Palabra.
Ta un momento pa celebra y un momento pa comparti cu rumannan di Boneiro y Corsou y sigur uni e lasonan mas ainda pa locual cu ta idioma, den e caso aki Papiamento.
E ta un competencia pa scolnan secundario. Tin tambe bon cooperacion pa esaki, cu Departamento di Enseñansa y Inspeccion di Enseñansa y lo kier structura den futuro e proyecto aki mas pa e por ta un instrumento den e lesnan di Papiamento, pa asina mas scol, casi tur scol secundario, por participa den e competencia aki y bira un competencia cu e ta nacional, pero ainda cu mas participante di tur scol secundario aki na Aruba.
Pa Departamento di Cultura, ta un bunita momento pa invita henter pueblo di Aruba, dia 14 di April awo, otro siman diasabra, den Cas di Cultura, pa 3’or, unda cu mas di 40 hoben di Aruba, Boneiro y Corsou, lo ta declamando poesia, conta cuenta y storia cortico, na Papiamento, sea propio of sea uno existente caba.
Shaniqua Jones
Ta pa di dos biaha cu Shaniqua Jones ta participando cu Arte di Palabra y tambe ta pa di dos biaha cu e ta yega asina leu tambe. E ta representa arte di Palabra Aruba, categoria C cu poesia original.
El a splica cu door cu tabata su prome biaha, el a yega di skirbi un cos. Na scol a puntr’e si e kier participa y a dicidi di skirbi y wak con leu e ta yega. Y Dicho hecho. El a yega te Corsou cu su poesia y tambe sali den finalista.
Poesia
Jones ta sigui comenta cu p’e, e ta dura un ora pasobra un poesia no ta yega y traha uno. Bo tin cu experencia cos, bo tin cu pensa cos. Poesia ta cosnan cu bo ta mira rond dibo y bo ta skirbi. Ta manera bo ta saca bo sentimento y bo kier trece un mensahe pa e publico.
Y pa prepara pa declam’e tambe ta tuma tempo. Si bo mester trah’e, e ta diferente cu si ta un otro autor. Si bo mes ta trah’e, bo ta sinti loke bo ta papia. E ta bin automatico den bo cabes.
Invitacion
Shaniqua Jones ta invita pueblo di Aruba completo, bin apoya nos muchanan dia 14 di April, pa 3’or di atardi, hunto cu esnan di Corsou y Boneiro, pa bin experencia un competencia con nan ta expresa nos Idioma Papiamento den poesia, den cuenta. Si bo no tin nada di haci, ta wardabo dia 14 di April.
Maria Pieternella
Maria Valentina Pieternella ta representa Ceque College y tambe ta participando den Arte di Palabra, hunto cu participantenan di Corsou y Boneiro. El a gana prome luga poesia original den categoria B y prome luga den historia original den categoria E.
Y awo e ta bay pa defende su titulo den e competencia cu ta na caminda. Ta un orguyo p’e pa representa su scol y tambe Aruba.
Maria ta invita un y tur dia 14 di April, pa 3’or di atardi den Cas di Cultura. E kier pa tur hende bin wak e talento cu e muchanan aki tin. E ta orguyoso di su mes. Y ta spera cu tur hende por ta orguyoso di nos representantenan. Pa Maria Arte di Palabra ta nifica hopi. Arte di Palabra, e tres palabranan ta expresa algo caba. Bo por uza un palabra y bo por transform’e den arte. Un y tur por experencia esaki, dia 14 di April den Cas di Cultura. Y asina tambe nan mes por y gusta pa bin Arte di Palabra y por participa den e competencia. E lo ta hopi leuk, Maria a expresa.
