No ta mucho tempo pasa cu gobierno di Aruba a firma un acuerdo entre WEB Aruba N.V. y Eagle LNG pa loke ta suministro di gas na Aruba. Den e procesa aki, Aruba lo bay experiencia cambio di Heavy Fuel Oil pa Liquified Natural Gas. Segun gobierno a specifica, esaki ta un paso di vital importancia pa Aruba, pues WEB ta bay opera den proceso mas limpi y eficiente.
Sinembargo, dicho acuerdo a causa controversia significante den e partidonan di oposicion. Riba esaki por corda con a haci varios miembro di parlamento a haci peticion pa para esaki y realisa un investigacion profundo riba kico ta e consecuencianan financiero pa Aruba, entre otro. Recientemente, ta parlamentario Aquannette Gunn di fraccion MAS a bin ta expresa su preocupacion riba e situacion aki.
Asina el a splica cu ta bon pa recorda pueblo cu e parti di hedging a caduca dia 31 di december 2021 y durante e reunion publico cu a trata Eagle LNG minister Glenbert Croes a señala cu ainda WEB Aruba N.V. no a inicia e proceso pa hedge pa e proximo dos añanan. Gunn a sigui splica cu ta importante pa haya sa cuanto dollar cada bari ta bay costa pais Aruba, pues e suma cu a caduca dia 31 di december 2021 tabata na balor di 38 dollar. Locual ta mas importante ainda ta e pregunta si prijs di awa cu coriente ta bay aumenta den e proximo dos añanan.
Pa e ultimo aki, el a splica cu mester cuestiona ta ki luna lo mira sea un reduccion of aumento riba e recibo di utilidad di e consumido. Tambe el a bisa cu mester tin clarificacion riba kico e maneho ta bay bira si acaso esaki aumenta, specialmente pa e personanan mas vulnerabel den nos comunidad. Por ultimo, tambe e parlamentario ta preocupa pa loke ta e siguridad di construccion di e terminal di LNG, pues no tin conocemento di unda e tuberia aki ta bay core y tampoco tin clarificacion di e costo di esaki.
Segun e parlamentario a enfatisa, gobierno no tin ningun plan di accion na luga pa tur esaki y ta spera cu e minister concerni por contesta su preguntanan por escrito.
Pa un relato mas amplio lesa edicion di TREMPAN mañan.
