Diadomingo, 5 di februari, e paradanan di carnaval a ranca sali cu esun di Oranjestad. Pero sin lubida e traspaso di mando cu a tuma luga manera tur aña dilanti di Bestuurskantoor, caminda Prome Minister di Aruba, Evelyn Wever-Croes, a duna un caluroso bon bini na nos dirigentenan di carnaval.
Tur cuater prins & pancho, tanto infantil, prins Bon y pancho Mucha, hubenil, prins Wiskunde y pancho Algebra, grandi, prins Bon y pancho Fresco y adulto, prins The Show y pancho Must Go On, a tene nan decreto.
Den presencia di e reinanan y nan finalista, tumberito, ganado di calypso y roadmarch infantil y hubenil, Prome Minister mr. Evelyn Wever-Croes a haci traspaso di mando.
Di un manera chistoso, a repasa tur e problemanan di nos pais, manera bishita real, problema di dump y hasta criticanan pa cu e vestuario di e prins cu panchonan, cu manera indica, no a keda cla prome cu e eleccionnan di reina.
Tambe a pidi pa e bin cu training di adelanta pa posibel candidatonan pa prins cu pancho sin lubida e echo cu nan ta prome pa gana y ultimo na haya nan premio. Te hasta e constante cambionan cu SMAC ta bin cu ne. Y asina por menciona mucho mas.
Na final, Prome minister a haci entrega di machete na prins Bon y pancho Mucha, nos prins y pancho infanti. Sigui pa entrega di e spada n’e prins y pancho, Wiskunde Algebra. Prins y Pancho di Carnaval, Bon Fresco a ricibi e yabi di pais Aruba, pa asina den e proximo dos simannan proteha nos Carnaval. Por ultimo, a haci entrega di yabi di spare, pa sigui cu e celebracion te na kimamento di momo, na Prins y Pancho Adulto, The Show Must Go On.
Esaki tabata e ceremonia oficial unda cu a sigui c’un brindis na Bestuurskantoor.
