Diasabra Noord a luci cu su parada di mucha, cu a conta cu ocho grupo. Tabata tin un total di 529 mucha riba pia cu a gosa di e parada unda cu nan a baila, saca potret y pasa momento agradabel. Esunnan na banda a disfruta di un tremendo parada yen di ambiente y un parada colorido.
E parada tabata tin dos banda y un brassband, cu a percura p’e musica p’e muchanan. Un parada chikito pero asina mes mahestuoso. Por a mira varios di e scolnan presente den e parada, manera Colegio Ora Ubao, Colegio Bon Bini y no por falta Chikitin Bin Bin, cu semper t’ey y asina ta yuda engrandece e parada di Noord.
Por a nota presencia di Reina Hubenil di Aruba su Carnaval, Jennely Winklaar, prome finalista Sheqayli Asencion, Reina di Carnaval, Adrienne Jacobs, como tambe Aruba su Sra. Carnaval, Geraldine Albertsz. No por laga afo nos prins & panchonan.
Algo remarcabel ta cu e Sra. Epi Unit Economia y prome finalista di Sra. EPI, Rosemery Rondón t’ey den tur parada. Sigur ta di aplaudi. Manera ta custumber, Reina di Noord ta esun cu ta habri e parada, cu den e caso aki ta Ziah-Amaliah cu ta tambe Reina Infantil di Aruba su Carnaval.
Pa e parada aki 50 polis tabata riba pia pa asina controla cu tur cos a cana bon. E parada a sali pa 2:00 pm fo’i Bubali Comercial Center y a bay direccion rotonde di Noord pa asina termina n’e rotonde. Cabes di e parada a yega pa 5:30 pm, mientras e ultimo grupo a drenta pa 6:00 pm.
Cant’i caminda tabata tin hopi hende p’asina mira e parada y disfruta di e ambiente musical como e gruponan. Durante e parada slachtoffer hulp tambe a forma parti di dje. E parada a cana bon y no tabatin mester di a aplica Faya Bo Haya.
