Recientemente tres comision fiho den Parlamento di Aruba, esta e comisionnan di Transporte, Turismo y Empresanan Estatal, a topa cu dirigentenan di Aruba Ports Authority (APA). Meta di e reunion ta pa duna un “update” di e trabounan andando na waf, desaroyonan nobo, retonan y oportunidadnan. E reunion a conta cu participacion di tur 4 Fraccion den Parlamento, pero na final a sali afo un realidad cu ningun di e fraccionnan tabata consciente di dje.
Na dado momento Ing. Jossy Figaroa, siendo e director di APA N.V. a expresa su preocupacion pa desaroyonan rond di posibel binmento di e Fast Ferry pa Aruba. E ehecutivo a aclaria na e Parlamentarionan cu APA entodo caso NO ta envolvi den nada di e proyecto aki, no a sinta nunca cu APA pa duna opinion, conseho ni pa informa di e plannan. APA ta cuestiona si e proyecto lo ta viabel mes, pasobra pa prepara un otro waf special pa e ferry aki na San Nicolas, lo rekeri un inversion di mas o menos 10 miyon florin, locual APA no ta dispone di dje awor aki.
Mester menciona cu e mensahe aki na Parlamento a bini di sorpresa, specialmente pa e fraccion di POR, representa den e reunion pa Allan Howell. El a expresa na APA di a kere cu e asunto aki ta regla caba y cu nan lo tabata cla pa lansa e proyecto aki pronto. Awor cu e asunto di waf no ta regla, lo mester bay bek na Gobierno pa mira con ta atende cu e reto aki.
Mester menciona cu e proyecto aki a inicia for di bou Gabinete Mike Eman II pero e tempo ey net Minister Otmar Oduber no tabata na fabor. E tabata defende e aerolineanan local y ta sinti cu esaki lo bira competencia pa nan y tin chens di stroba nan benta cu ya tabata pasando den momentonan di reto.
E partido cu pa algun aña tabata pusha duro pa e proyecto tabata Democracia Real di Andin Bikker. Ora cu el a uni cu Otmar Oduber den POR, e proyecto aki a bin cune y asina a haya sosten te cu awor ta pushand’e den Gobierno. Sinembargo, un “Fast Ferry” no ta un asunto di Husticia, pa cual e ta bira un proyecto pa Minister Chris Romero di Transporte, cu ta pushando e proyecto pa evalua si e por mira luz di dia. E intencion ta pa yega na acuerdo entre e islanan ABC pa pronto e ferry por cuminsa pa caba.
