Anselmo Pontilius, mediador di Gobierno, a splica cu nan a trata di trece e partidonan hunto. Nan a gradici e cooperacion di e dos partidonan cu finalmente a realisa cu ta na mesa tin cu resolve tipo di conflictonan cu por surgi y ta kere cu den un ambiente hopi habri, e partidonan a debati loke a surgi.
Awor aki ya, na momento cu nan a firma e documento aki, a supera un etapa cu no mester ta asina. Ta evidente cu tin un relacion entre FTA y RBC di hopi aña. Un relacion hopi profesional y e por sosode loke a pasa, pero, importante ta cu e partidonan a supera esaki den un documento cu ta hopi cla. Ta spera tambe cu esey lo no mester ta un efecto, den todo caso, riba e funcionamento di banco. Pero contrario ta compronde for di FTA cu trahadonan lo a cuminsa traha caba awe merdia y e problema lo ta tras di lomba y cu ta mantene e relacion di trabao habri entre e partidonan. Ta gradici tanto e dirigentenan di RBC como esnan di FTA y cu nan lo percura pa preveni esaki mas tanto posibel. Segun Pontilius, e acuerdo ta cu ta mantene e texto di e contracto colectivo manera e ta, mientras cu e partidonan tin un acuerdo cu e compania lo procede legalmente pa trata di haya hues of opinion di hues riba e articulo aki, si e por wordo elimina of no.
