Despues di 25 aña, un de artistanan femenino mas cotisa den e mundo di musica ta bolbe Aruba!
Despues di mas di un aña di negosiacionnan extenso cu e gran artista aki, promotornan tin e grato placer di anuncia cu e ta official! Ana Gabriel a scoge Aruba como parti di su gira y lo ta riba nos isla pa duna un regalo na tur e mamanan di Aruba dia 11 di mei proximo den un concierto sin igual.
Ana Gabriel ta conoci pa ta un artista di taya y awor ta honra Aruba cu su bishita. Durante e concierto aki lo por spera presencia di su banda completo y tambe su mariachi. E anochi aki ta premira di bira algo unico cu Aruba henter no por perde. Un concierto unico, combina cu artistanan local pa asina haci e anochi aki uno inigualabel riba dia di mama. Banda di e anuncio official di e concierto di Ana Gabriel, na mes momento ta anuncia cu pronto lo por conta cu apertura di su pop-up store na unda cu un y tur lo por pasa y cumpra differente articulo relaciona cu e magno artista aki.
Na e momentonan aki, ultimo negociacionnan ta tumando lugar pa loke ta trata e localidad di concierto y pronto lo duna tur demas informe necesario pa loke ta trata esaki, loke cu si ya caba por sigura ta cu esaki lo tuma lugar na Oranjestad. Mientrastanto ya caba por yama y haci reservation di bo mesa VIP na 5686283 of manda un whatsapp na 5999 510 7000 y pronto lo anuncia benta di entrada general. Ta invita pueblo di Aruba henter pa responde en grande na e concierto di e gran artista aki cu despues di 25 aña ta regresa nos isla pa un solo anochi!. E acohida den comunidad ya caba ta surpasando tur expectativa, pesey reserve bo lugar na tempo y pasa un dia di mama unico!
