Hopi positivo e futbolista Amy Henao ta sinti su mes despues di a habri su wowonan, despues di tabata den coma. Hopi agradecido na tur hende cu a bin ta haciendo oracion pa su recuperacion.
E hoben di 18 aña a haya accidente algun siman atras na Paradera y a sufri hopi sla interno, entre otro un hemoragea. Algun dia despues a transporte cu Air Ambulance pa Cali, Colombia unda te awe e ta interna den Cuido Intensivo, luchando pa su recuperacion. Den esaki e ta haya hopi apoyo di su mama Elizabeth Jansen, kende, apesar di e cansancio, ta continuamente na cama di su yiu, encurashand’e pa sigui lucha. E ta hopi agradecido na tur esnan cu ta pensando y resando pa Amy. “Danki na tur hende.”
E mesun palabranan aki a keda expresa pa Amy, kende apesar di su dificultad pa papia, a dicidi di manda un mensahe breve pa pueblo di Aruba, bisando su amistadnan cu e ta recuperando cu ayudo di Dios y tur e oracionnan. Den combersacion cu nos reportero di 24ora.com Carlos Yedallah, el a logra manda un mensahe breve pa tur esnan cu ta pensa riba dje.
