Un di e sospechosonan den e investigacion penal cu a haya e nomber di “Avestruz”, ta e ex bankero Alwyn Lin. Aunke e no tabata na Aruba, awe Polisnan hunto cu Fiscal mr. Pronk y Hues-Comisario mr. Sap a drenta su cas den area di Noord y a bishita su post-adres den Rumbastraat. No ta conoci kico ta e acusacionnan contra Lin, pero tin di haber cu e proceso di otorgamento di tereno entre aña 2009 pa 2017. E demas personanan envolvi ta sospecha di estafa, soborno, falsificacion, corupcion y mas. Lin a yega Aruba awetardi for di un biahe y a haya su mes confronta cu e realidad aki. Aunke e no tabatey, a drenta cas toch y a topa cu e asistente di cas.
Den pasado Alwyn Lin tabata Director di AIB-Bank pero a perde su trabou. E tabatin un funcion den top di AZV pa un tempo. El a yega di traha como consehero den e Gobierno anterior pa un tempo. E tin varios negoshi riba su nomber y tabata cumpra tereno pa clientenan. Ultimo tempo Lin a uni cu dos ex-colega di AIB-Bank y a habri un compania cu mesora su tras a haya e financiamento di henter e proyecto multimiyonario di Aeropuerto, di mas o menos mey biyon florin. A refinancia e debe di FCCA y ta net den proceso avansa pa via di e mesun compania ey, refinancia e debenan di Utilities Aruba NV tambe.
Awor cu Ministerio Publico a start un investigacion penal den su contra, e ta confronta un reto pisa aki relaciona cu posibel corupcion den proceso di cumpramento di tereno entre aña 2009 pa aña 2017. Kico tur a bay cune for di su cas y na su postbus situa den Rumbastraat no ta conoci. Ministerio Publico a laga sa awe di no ta bay den detaye di e acusacionnan ni tampoco di kende tur ta e sospechosonan envolvi den e investigacion “Avestruz”, cu ta conta cu cooperacion di RST y di Landsrecherche di Corsou.
