“Hopi hende ta pensa cu cultura ta evenementonan rond di por ehempel Dera Gay, Carnaval y 18 di Maart. Pero cultura ta hopi mas. E ta e forma di biba di hende, cada expresion humano. Esaki ta importante pa sa, pasobra e ta yuda nos realisa cu ya caba nos tin hopi cultura presente na San Nicolas”, asina Parlamentario Alvin Molina, di e fraccion di MEP, a duna di conoce. Tin musica, artesania, cuminda, religion, museo y monumento. Na Aruba tin e tendencia di no gosa suficiente di tur bendicionnan cu nos tin, incluso nos cultura. Mester reconoce, aprecia y celebra tur forma di cultura cu tin.
“Dimes tin hopi espacio pa amplia actividadnan cultural pariba di brug. Den mi opinion, mas actividad cultural lo trece mas hende hunto, trece mas union y ta trece oportunidad pa comercio crece. Ademas, mas actividad positivo y crecemento economico lo eventualmente resulta den mas siguridad den e barionan”, ta opinion di Parlamentario Molina.
Dia 4 di april 2022 e parlamentario a presenta un mocion pa Gobierno (sigui) inverti den San Nicolas como Cultural Heritage City. E idea tras di e mocion aki tanbata pa Gobierno inventarisa cua actividadnan cultural por wordo organisa pariba di brug (tambe) y yuda promove actividadnan di organisacionnan no gubernamental.
“Coleganan Ricky Hoek, Darlaine Guedez-Erasmus y ami mes a reuni riba e topico aki cu representantenan di Departamento di Cultura y di Enseñansa. Mirando cu e desaroyo aki lo rekiri esfuersonan riba tereno di cultura, infrastructura, social y turismo. Ta esencial pa existi un bon colaboracion entre diferente ministerio. Nos a palabra cu como parlamentario nos lo pidi gobierno atencion pa esaki. Departamento di Cultura lo presenta un concepto con pa desaroya cultura pariba di brug”, asina e parlamentario a sigui splica.
El a gradici Siegfried Dumfries, Angeline Maduro, Lisette Maduro y Jose Miguel Donata pa e reunion fructifero y tambe Minister di Cultura, Xiomara Maduro pa tuma accion mesora pa cu e mocion presenta.
