Diasabra, 27 di october den oranan di mainta, alumnonan di Colegio Arubano Havo 4 a yuda cu e evento di limpiesa di e beachnan na e costanan di Aruba, organisa pa AHATA.
E actividad a inicia pa 8.00 di mainta y a termina pa 10.30. Un cantidad grandi di alumno cu nan guia a participa na e evento. Cu e realisacion di e evento aki, scol kier enfatisa cerca e alumnonan riba e importancia di trabou voluntario den comunidad.
Anualmente, e alumnonan di HAVO 4 ta haci un biahe cu metanan educativo pa un otro pais, unda nan ta permanence un siman. E aña escolar aki den luna di april mas cu 100 alumno di Havo 4 di Colegio Arubano lo biaha pa Quito, Ecuador. E biahe educativo tin como meta principal cera conoci y mustra respet pa otro pais, naturalesa y cultura, cu enfasis riba e parti sostenibel. Banda di esaki, e biahe entre otro tambe ta destina pa e alumnonan haya y comparti experencia nobo hunto, siña maneha placa, carga responsabilidad den proceso di grupo, engrandece e habilidad di adaptacion na situacionnan nobo y ta brinda e alumnonan e oportunidad di haya orientacion riba e posibilidad di enseñansa superior.
E actividad di limpiesa di e beachnan na varios costa di Aruba, banda di e actividadnan pa recauda fondo, ta e prome actividad comunitario, cu e alumnonan di HAVO 4 mester cumpli cu ne pa asina por realisa nan biahe educativo na april 2019. Ta spera cu e comunidad di Aruba, manera ta e caso cu e añanan anterior, sigui contribui cu e alumnonan di HAVO 4 y duna nan respaldo cu compra di carchi pa caminata, rifa y cuminda. Boso yudansa y colaboracion ta necesario y altamente aprecia.
