Den un conferencia di prensa awe mainta, minister di husticia Rocco Tjon a elabora riba e vacatura pa altocomisario di polis. A inicia su discurso mandando palabra di condolencia y forsa pa e famia y amistadnan di Roberto Geerman, kende a fayece awe mainta despues di tabatin algun complicacion cu su salud. Tjon a bisa cu e tabata un gran persona den comunicacion como tambe den deporte.
Pa loke ta e vacatura, Tjon a splica cu actualmente e cuerpo policial ta den desaroyo cu plannan grandi, incluyendo proyecto di ICT como tambe proyecto piloto di mobile app y data terminals. Fuera di esaki, ta realisando tambe cierto cambio den e structura di opleiding pa bira polis. Pues ta asina cu tin un comision trahando riba transformacion di academia di polis, mas cu claro pa mehora esaki den diferente aspecto pa asina por brinda un enseñansa di calidad na tur esunnan interesa pa eherce e profesion di polis.
Asina Tjon a splica cu nan ta buscando un korpschef pa un termino di tres aña pa duna contenido na tur e proyectonan menciona, di cual algun ta andando caba. Segun a amplia, tur esunnan cu ta cumpli cu e rekisito di sea un HBO of WO opleiding como tambe e experiencia rekeri pa eherce e funcion aki den su totalidad por aplica pa e posicion aki te cu dia 10 di februari 2022. Por manda e carta di solicitud na [email protected]
Un comision asigna ta bay haci un seleccion a base dje rekisitonan menciona y e aplicante mester a pasa un ‘veiligheidsonderzoek’, un ‘geneeskundige onderzoek’ y un ‘psychologische assesment’ pa por bin na remarca pa e posicion en cuestion.
