Albert Martis di Meteo Korsou nomina pa ta segundo visepresidente di WMO

Durante e periodo di 3 pa 14 di yüni World Meteorological Organization (WMO) a organisá e di 18 kongreso, na Suisa,  kaminda hefenan di departamento di meteorologia rònt mundu ta reuní. Durante e reunionnan aki ta para ketu na realisashon di e metanan stipulá pa e añanan binidero i tambe ta trata diferente tópiko di importansia manera liderato i direkshon di e organisashon den e famia di Nashonnan Uni. Durante e reunion aki lo tene elekshon pa direktiva nobo i direktor di Servisio Meteorológiko Kòrsou, Señor Albert Martis,  ta un di e kandidatonan pa ser elegí komo segundo visepresidente di e organisashon.

ADV

Señor Martis ya pa basta aña ta uzando su kontaktonan den área di Karibe i riba nivel mundial, pa asina saka benefisio pa funshonamentu di Servisio Meteorológiko Kòrsou. Esaki por nota den fondo nan ku e la logra risibí pa asina digitalisá e sistema di informashon di wer, sòru pa diferente trahadó di e departamento por sigui kursonan avansá den eksterior i tambe sòru pa Kòrsou tin un radar ultra moderno  kual su kobertura ta di un área mas grandi, esaki ta yuda antisipá riba sistemanan ku ta aserka nos isla basta trempan.

Teniendo kuenta ku señor Martis su trayektoria den mundu meteorológiko i e entusiasmo di su koleganan pa ku su kandidatura, e chèns ta hopi grandi ku e ta  keda skohe komo segundo visepresidente di e organisashon. Esaki lo tin nifikashon grandi pa desaroyo di servisio meteorológiko na Kòrsou i tambe e área di Karibe

Servisio Meteorológiko Kòrsou ta forma parti di e Ministerio di Tráfiko, Transporte i Planifikashon Urbano. Minister Jesus-Leito  ta e minister enkargá ku e ministerio aki.Den kuadro di esaki Minister Jesus-Leito tambe ta asistí e kongreso di WMO durante 12 pa 14 di yüni, pa asina hiba kombersashon ku e Sekretario General  i piesanan klave di e organisashon i demostrá sosten total na kandidatura di señor Martis.

Comments

comments