Tabata pa 1:38 pm cu e avion di matricula N105UW a yega Aruba, di e compania American Airlines, procedente for di Philadelphia. E pasaheronan a baha pa esunnan na Aruba a aborda y asina pa 2:49 pm e avion a bolbe lanta vuelo AA-534 for di Aruba pa Philadelphia atrobe.
Algun minuut despues di tabata rumbo pa Merca, a drenta un alarma di candela den e cockpit, indicando cu posiblemente tin candela den e compartimento di maleta den e avion. A activa tur instancia mesora, entre otro ambulance, brandweer y polis, pa prepara pa e aterisahe di emergencia.
Algun minuut despues, pa 3:16 pm, e avion Airbus A320-214 a aterisa na Aruba sin ningun problema. Claro cu Cuerpo di Bombero tabata ward’e riba rampa caba, por si acaso e por a baha cu problema of lo por a sosode un accidente of si tabatin candela di berdad den e barica di avion.
A resulta cu no por a haya candela, pero a para e avion suficiente leu di e edificio di aeropuerto. Awo inspectornan lo mester investiga e alarma, pa mira kico a activa e alarma.
Aunke tabata un ora pisa di trafico, polisnan a logra cera tur e camindanan principal cu ta yega aeropuerto den un tempo record. E camindanan tabata cera prome cu tur ambulance y mas personal di bombero por a yega na e kazerne pa bay riba posicion stand by. Probablemente lo mester warda awo pa American Airlines dicidi di ta drecha e avion aki mes of ta manda un otro avion bin busca e pasaheronan cu a keda pega na Aruba awo.
