E bloke di sindicatonan cu ta representa trahadonan publico, a manda dos carta pa gobierno, mirando cu tin varios punto, apart di Indexering cu ta bezig cu nan y cu no ta hayando oido, segun Edward Maduro di SADA y vocero di e bloke sindical.
Un di e cartanan ta riba indexering, di cual tema nan no ta scuchando nada. Ta wardando riba reaccion di parti di gobierno riba carta cu a entrega na december. Tambe tin cu informa, manera cu a yega di bisa caba, un comision lo mester a wordo forma.
E comision en berdad a wordo forma por medio di un MB, pero te dia di awe no a yama ningun reunion. “Aki por mira kico ta e interes riba e tema aki di parti di gobierno tocante indexering. Tur ambtenaar ta wardando reaccion di gobierno. Gobierno tin su puntonan, pero e sindicatonan tambe tin nan punto, pa mustra gobierno cu no lo acepta e 5 florin y 75 cen. Ta lamenta cu 2019 a termina y 2020 a cuminsa y te dia di awe no a scucha nada di parti di gobierno,” Maduro a expresa.
E otro carta entrega tin di haber cu e otro puntonan. A informa gobierno desde 8 di april 2019 cu kier un aclaracion y tambe un contesta di parti di gobierno.
Ta trata temanan di por ehempel GOA, e parti di gelijkbedrag y bashi-premie pa esnan cu a baha cu pensioen desde 2015.
Otro tema cu tin varios punto cu ta laga di desea, manera con DRH ta atende cu cierto casonan di ambtenaar en general. Eynan tin cu bisa cu gobierno cu ta papia di integridad y respet, ta sigur cu gobierno mester cuminsa atende cu DRH riba esaki.
No solamente un dienst specifico, sino henter e aparato gubernamental cu tin cierto asunto di ambtenaarnan cu ta keda pega cu por ehempel promocion y cierto acto of pasonan cu DRH ta tuma cu cierto ambtenaarnan.
Ta un carta cu a entrega caba dia 3 di september, pidiendo prome minister pa por reuni riba e temanan aki. Lamentablemente no ta scuchando nada. Tin un grupo di pensionado cu a baha despues di 2015 cu tambe a yega di manda y pidi gobierno reaccion, unda cu e grupo aki lamentablemente mester a bay te corte pa corte bisa gobierno pa contesta nan.
Ta tipo di cosnan cu no mester yega asina leu cu mester bay te corte pa djis haya un contesta di parti di gobierno. Ta lamentabel pasobra durante reunion di dia 8 di april, 2019, minister presidente a laga sa cu riba e puntonan di por ehempel gelijkbedrag y bashipremie ta riba e mesun liña cu e sindicatonan. Cu mester a haya presentacion y tambe un solucion mas pronto posibel.
Ya caba nos ta na januari di 2020 y no a ni reuni riba e temanan aki. Otro grupo tin cu bay te corte pa forsa un decision di gobierno. Ni bisa cu gobierno ta admiti y bay bek. Ta decision cu a yega di tuma den pasado, sino duna un contesta na e grupo di pensionadonan cu a baha na 2015.
