Tabata diaranson alrededor di 10:30pm ora cu Minister mr. Andin Bikker a yega cas cu a topa un homber indesea wardand’e pafo di su cas. E chauffeur di e mandatario a bisa e homber cu e mester bandona e sitio sino ta yama Polis. E homber a bisa di no a bin busca problema, solamente e kier a papia un rato cu Minister. Como cu e no kier a tende, a yama Polis cu a yega mesora y a splica e ciudadano cu den e oranan ey no por regla nada y pio na cas di un mandatario y cu e mester bay di eybanda. Nos a combersa cu e homber di origen Haitiano, cu a splica cu Warda nos Costa a detene un mucha, conoci di dje. El a pasa henter dia na Warda nos Costa y DIMAS pa mira con por regla e papelnan di e mucha y pa por logra su libertad. Na Warda nos Costa el a papia cu Trudy Hassel cu a bise cu e lo deporta e persona y cu e unico persona cu por cambia su opinion ta Minister Bikker. Consecuentemente e homber a busca paradero di e Minister pa sak’e for di su problema.
El a bay oficina pero a bis’e cu e no por a haya un audiencia cu Minister. El a dicidi bay su cas pa ward’e eynan pa papia cune. Polis a splica e homber cu ta compronde tur cos pero cu anochi lat asina no por molestia Minister na su cas, ta su privacidad. E homber a contesta e defensornan di ley cu e no a bay lat, e tabatey di trempan pa purba topa e mandatario, pero ta cu e Minister mes a yega cas lat. El a scucha e ordo di Polis y a bandona e sitio y a ked’i busca un forma awe pa topa Minister Bikker na oficina pa pidi’e pa duna ordo pa saca e ilegal for di Warda nos Costa pa evita su deportacion.
