Stimula mas hoben pa eherce agricultura, ta promove siguridad di alimentacion. Pa e motibo aki, den siman cu a pasa, United Farmers y Santa Rosa a reuni hunto cu Minister Ursell Arends y Minister Geoffrey Wever.
Durante e encuentro aki a toca diferente tema, cual a inclui con pa stimula nos hobennan pa haya mas interes den agricultura. Gobierno di Aruba kier crea un modelo economico nobo unda cu e inversionnan necesario por ser haci den e modernisacion di practica agricultural. Inversion corecto por yuda percura pa cupo di trabou nobo y tambe limita importacion di producto agricultural di exterior.
Na e momento aki tin 8 scol caba cu a expresa nan interes, unda cada un tin 350m2 pa cuminsa cu e proyecto piloto aki.
Gobierno di Aruba kier yega na 15% na 2025 di siguridad di alimentacion – pues produccion local. Den pasado a haci un SWOT analysis unda a resulta cu ya caba tabata tin varios proyecto agricultural na Aruba. Asina aki a sali na cla cu hopi ta opta pa produci lechuga, caminda cu tin varios otro producto tambe interesante cu lo por cosecha localmente.
Di parti di Directie Economische Zaken, Handel en Industrie “DEZHI” ya caba ta organisa diferente workshop pa cunukero. TNO tambe tin estudio haci riba best practices di con plantamento mester wordo eherce na Aruba, tumando cuenta cu nos clima.
Santa Rosa y United Farmers kier centralisa e conocemento pa asina hunto por pone regla y regulacion vigente pa asina subi eficiencia, y percura pa no satura e mercado cu un solo variedad – of variedad limita – di producto. Den e proximo siman por spera di firma conhuntamente un MOU pa reenforsa e colaboracion. Asina por percura pa mehora siguridad di alimentacion, y logra realisa e meta di 15% produccion local pa 2025.
