Diaranson ultimo a tuma luga un graduacion di varios mama hoben na Fundacion ADRA Aruba (Adventist Development and Relief Agency). Ta trata aki di e di cinco grupo cu a gradua di nan proyecto di Mayornan Hoben, cual ta un proyecto cu ta dunando un di dos oportunidad n’e mamanan mas hoben pa pasa di ta un mayor hoben pa tutor di bida.
Mirugia Leocadia-Zink, vice-presidente di Fundacion ADRA Aruba, a splica cu e ta satisfecho y contento pasobra por a mira cu e hobennan aki tabatin gana di siña pa por drenta comunidad un biaha mas.
Ta trata aki di un total di seis mama hoben a gradua, pero ta cuater so a yega, mirando cu dos a sali na estado y un a haya trabao, cu e no por a bin mas.
Alvin Molina, kende ta miembro di parlamento pa fraccion di MEP, a comenta cu famia t’e fundeshi di comunidad. Ser mayor ta un responsabilidad mas grandi cu cada un ta carga como ser humano. Lastimamente e ta un realidad cu no ta tur famia uni, ta uno completo, unda mama cu tata ta cria e yiu hunto. Ta p’esey Molina ta hopi contento cu tin fundacion manera ADRA Aruba, cu ta yuda e mamanan hoben, pa nan prepara nan mes pa nan por desaroya nan mesun persona. N’e mesun momento por t’e miho mama posibel pa yuda nan mes y nan yiunan progresa.
Pa mas cobertura lesa TREMPAN.
