Corte mester a trata un caso serio di abuso sexual awe, cu a tuma luga na aña 2018. Pero e acusado no a ni presenta! Segun deurwaarder a splica, a entrega Angelo Giovanny Apostel su dagvaarding un siman pasa y e no tin ningun indicacion pakico e no a presenta den Corte.
E acusacion contra Apostel ta cu e lo a comete abuso sexual cu un menor di edad den e periodo di 13 di maart 2018 te prome di november 2018. Su abogado tampoco a presenta den Corte pa defend’e den e caso penal cu tin contra dje.
E representante di Ministerio Publico a splica cu e caso aki ta uno demasiado serio pa trat’e den ausencia. E acusado ta den libertad mientrastanto, pasobra e caso aki ta uno basta bieu. Probablemente pa motibo cu legalmente a transcuri demasiado tempo pa cual mester a lague liber.
Hues na final a splica cu pa motibonan tecnico, e ta destrui e citacion actual y mester laga traha un nobo pa entrega atrobe na e acusado. Pa e motibo aki no tin fecha ainda pa continuacion di e caso penal.
