Un reunion grandi SEPPA a tene diaranson atardi laat pa anochi cu miembronan cu ta traha den Gobierno y unda cu e unico tema tabata Indexering.
Magaly Britto, Presidente di SEPPA, a splica cu a reuni cu fundacionnan pasobra e tema di subsidio ta uno hopi delicado, ya cu e trahadonan no sa con nan situacion ta regla despues di cambio. Y entre otro nan ta scuchando for di directivanan cu indexering no ta conta pa nan. Esaki ta nifica cu ora di introduci output subsidie a laga kita un derecho for di e trahadonan. Pues ta trata di trahadonan di SABA, Wit Gele Kruis, etc.
A mustra cu cifra e situacion di 2014 te cu 2017 pa cual no tabata por a pidi indexering , pero esaki si tabata e caso na 2018 ora cu a surgi inflacion. A bin ta papiando di april riba e tema aki, pero no ta hayando e debido atencion, ya cu tabata keda rek e situacion y no ta yega na nada. CU e postura aki, el a bisa, ta “hurt” e trahadonan.
Pa e motibo aki no kier duna mas tempo y ta exigi un proposicion na mesa. “Nan no kier laga e siman aki pasa sin cu algo ta wordo haci, sin cu e trahadonan mustra nan malcontento,” e sindicalista a bisa.
E reunion tabata bon atendi, y tambe pa e trahadonan hoben cu ta interesa pa sa con a yega na tur e beneficionan cu e empleadonan publico. Empleadonan di e fundacion a demostra cu nan ta malcontento cu e situacion. Gobierno a pidi mas tempo y empleadonan no ta di acuerdo. “Nos kier pa Gobierno bisa bon cla si e indexering ta conta pa nan of no. Bisa cu ta respeta nan derecho prome cu a bini cu output subsidie. Y nan ta dispuesto pa manda un señal di malcontento y lo tin un accion. Pero ta spera di haya un contesta prome. Nan no kier carta, pasobra e no ta yuda na nada.”