Un poco despues di 7.30 a pidi presencia di ambulance y Polis urgente riba brug di Piedra Plat unda un accidente pisa a caba di tuma luga.
Na yegada di e prome unidadnan policial, a pidi refuerso pasobra tabata mustra cu e ta basta serio. Autonan di polis a yega di ambos banda y a bin topa cu tres vehiculo cu tabata envolvi cu diferente persona herida.
Na e sitio tabatin dos ambulance pa transporta e heridonan pa hospital. Mester a haci uzo di materialenwagen tambe pa saca dos di e chauffeurnan cu no por a sali riba nan mes for di e vehiculonan accidenta. Casi 10 auto di Polis a yega na e sitio pa atende cu e trafico y e publico cu a cuminsa yega, di cual un gran parti tabata famia of amigo di esnan envolvi den e accidente.
Polisnan tecnico a yega na e sitio pa cuminsa nan investigacion pa motibo cu na prome instancia no por a saca afo mesora ken a causa e accidente y con el a tuma luga. Hecho ta e daño material tabata considerabel.