Diadomingo, un tiki prome cu 2’or di marduga, informe a drenta di un acidente basta pisa riba e caminda di Ser’i Tijshi. Varios patruya di Polis a yega na e sitio di e accidente y tambe pa ambulance pa tey presente pa un di e chauffeurnan, di cual cu segun por a compronde te hasta a bay fo’i tino un rato.
Na e sitio topa cu tres auto cu basta daño y un di nan (un Hyundai color blauw cla) na e otro banda di e caminda. Segun informacion no oficial compila na e sitio, a bin compronde cu e accidente ta consisti di dos acidente.
Chauffeur di e Honda Accord a conta cu e tabata bayendo abou ora e Hyundai color blauw cla a dal su tras.
Na prome instante tabata tin daño material so y a avisa Polis di e accidente. Mientras cu nan tabata warda riba e asistencia Policial, a bin un Hyundai Accent blanco di pariba. Aparentemente e Hyundai Accent tabata pustando cu un otro auto. Den esey e no a ripara e dos autonan cu a accidenta su dilanti riba caminda. Aki ta unda e Hyundai blanco a dal cu basta velocidad patras den e Hyundai Blauw y pa despues sigui y pega patras den e Honda Accord tambe.
E impacto tabata asina fuerte cu e Hyundai Blauw a bay te na e otro banda di caminda riba e caretera cu ta bayendo p’ariba. Ademas e chauffeur di e Hyundai blanco a bay fo’i tino un rato. E di 4 auto cu tabata pustando, aparentemente, no a dal den ningun auto pero sinembargo no a keda na e sitio, pero a sigui core, lora na e rotonde un tiki mas pabou y a bira bay bek ariba. Polis a tuma nota di tur cos mientras e caminda a keda cera pa basta rato
