Diadomingo anochi pa mas of menos 8:40 pm a bati alarma pa un desgracia serio riba e caminda di Bloemond, na Paradera. Na yegada di polis y ambulance, a constata cu tabata trata aki di dos auto, di cual tabatin cuater persona cu a resulta herida y di cual por lo menos un di nan a keda pega den auto, pa cual mester a pidi presencia di Materialenwagen di Brandweer tambe na e sitio di accidente.
Cuerpo di Bombero a presenta cu no menos di dos unidad pa por a brinda asistencia urgente. Mientras tabata corta e auto, e paramediconan di IMSan tabata brinda prome auxilio na e victimanan sea den e auto pega ainda, of esunnan cu a baha sin problema.
E dos autonan envolvi tabata un auto marca Honda modelo Fit, color blanco, numbera A-73885. E otro auto ta un auto marca Nissan modelo Skyline RHD, color shinishi, numera A-76890. Ambos auto a haya basta daño, debi na e impacto fuerte.
Door di e dalmento, un di e autonan a drenta un cura di cas y a kibra e meter di awa. Consecuentemente awa tabata spuit bay halto, pa cual tecniconan di WEB Aruba N.V. tambe mester a presenta pa drecha e fayo. Polis ta investiga awo con e accidente a sosode.
