Algo prome cu 9’or di anochi a drenta informacion di un accidente di trafico cu herido. A indica cu esaki a tuma luga riba Avenida Milio Croes na altura di e crusada dilanti di edificio di Voogdijraad. Na yegada di patruyanan a constata herido di gravedad, pa cual a pidi asistencia inmediato di Ambulance.
E prome unidad a yega y di biaha a cuminsa duna prome auxilio na e chauffeur di e brommer cu tabata benta cant’i caminda bou di e kwihi na skina di Express Events. E victima ta un hende homber cu varios herida na su curpa.
Informacion obteni na e sitio y momentonan despues di e accidente, ta indica cu e victima ta Anthony Croes, kende den luna di februari ultimo tabata envolvi den un accidente caba riba e mesun brommer aki y no mucho leu di e sitio, esta na rotonde di Cumana.
E situacion di e accidente ta duna e impresion cu e auto tipo sedan, marca Mitsubishi, modelo Lancer, cu plachi di number A-15184, tabata cla pa bay crusa na su man robes pa bay direccion di Sabana Blanco, y e brommer tabata bayendo noord bahando for di Flora Market direccion Dakota.
A pesar cu ambos vehiculo a sufri gran daño material, e chauffeur di e auto ta mustra di no a ricibi mucho sla durante e accidente te cu e tabata djis sinta den e auto. Mientras tanto un di dos unidad di Ambulance a yega na sitio pa un di dos herido.
Testigonan ta papia cu e pasahero riba e brommer, un persona femenino a keda lansa den laira door di e impacto y a cay varios meter despues di e chauffeur, riba asfalt. Nan a mir’e ta sangra for di su boca. Ambos herido a keda transporta pa hospital pa ricibi tratamento medico avansa pa nan herida y golpinan.
Mientras tanto agentenan a mantene caminda cera pa haci e investigacion necesario.
