Preocupacion ta continua y tension ta sigui subi. Gina Maduro, presidente di sindicato ABV cu ta representa e trahadonan di hospital, a splica cu tin un preocupacion keto bay mientras cu tin construccionnan andando.
E problema di construccion di e hospital ta structural y no ta algo nobo, segun Maduro. Pero el a bira manera un custumber, principalmente na cierto departamentonan cu ta mas vulnerabel manera Radiologia cu no por a labora door di problema di schimmel, holo y no por duna servicio. En berdad e empleadonan y e sindicato, no tin ningun confiansa mas den e proyecto aki. E proyecto aki ta un desaster total, pasobra no tin otro palabra mas pe. Continuamente tin problema pa cierto problemanan.
Siman pasa tabattin na e laboratorio unda cu tabatin un leak. Tur e airconan, mobil, ta consecuencia di un departamento ta afecta e otro departamento. Emergencia tin e problema di ventilacion mientras cu diaranson mainta Departamento di Radiologia no por eherce nan actividad door di e situacion reinante eyden. A informa esnan concerni varios biaha caba di e problema aki. Segun Maduro a splica, tin diferente scenario y personanan cu ta envolvi. En principio doño di e edificio ta SOGA mientras cu Hospital ta e usuario. Pa e proyecto di expansion y renobacion, a otorga e contracto na e compania Mericano Arellano. Den e proyecto aki hospital tabatin e supervision cu un “bouwcommissie” cual hunto cu SOGA tabata dirigi e proyectonan aki. Loke ta resalta, segun e sindicalista, ta cu nan no tabatin control den e problema aki. “E problemanan aki ta asina grandi, e construccion no tin un structura, no tin un maneho concreto y continuamente tin problema. Ta soluciona un problema, y ta crea otro problema. Asina por keda menciona.”
Escalacion di problema
ABV a sinta diferente biaha cu minister di salud, cu SOGA, bouwcommissie y stakeholdernan. E problema aki no ta un problema cu ta desconoci. A yega di sinta varios biaha na mesa, a haci promesa cu ta bini cu solucionnan, pero te ainda ABV no ta mira solucionnan concreto. “Al contrario, e problema ta keda escala. Mas e fasenan anda, mas e problemanan ta aumenta.”
Kico por evita e problema
Maduro a splica cu ABV mes como sindicato diamars ultimo tabatin e reunion di contacto regular cu tin palabra. Eyden a bin cu un proposicion pa bin cu otro meting. A propone pa laga un compania di Corsou pa haci e midimentonan di aire. Esaki pasobra ABV kier yega na un solucion cu e holonan desagradabel y peligroso cu ta afectando e miembronan. A logra haya luz berde pa haci uzo di e compania di Corsou.
Arellano no ta contento cu sindicato
E contratista ta sinti cu e proyecto ta bon, aunke cu gobierno ta haciendo su investigacionnan. Despues di tur e situacionnan cu sindicato ta wanta, na final ta su miembronan ta sinta eyden. Ni SOGA ta sinta eyden, pero ta e trahadonan tin cu wanta tur e consecuencia. Riba dje ta señala tur e problemanan di salud, e risiconan cu nan ta hibando y cu ainda nan no sa kico ta e consecuencianan. Ainda e contratista ta capaz di hiba e sindicato corte. E contratista ta demanda e sindicato cu nan ta bisa cu nan maneho no ta bon y cu e construccion ta un desaster. Maduro ta keda ripiti e construccion ta un desaster total. “Mi ta bisa publicamente cu e luga ta un desaster total. Cualkier hende por drenta e luga, y por mira ki mal maneho tin. Tur e construccion nobo, proyectonan cu a entrega caba ta total loss, kibra, y mester drecha loke ta malo y tin problemanan cu schimmel. Ta construccion nobo y no por tin “ lekkage”. Esaki no por,” segun Maduro.
Dia e caso bay corte, ta pueblo Maduro ta invita pa bay. Na final ta pueblo lo paga pa esaki.
Caso den corte
E caso tabata tin un fecha cual tabata dia 28 di augustus. Pero a pidi un uitstel, mirando cu abogado di ABV tabata cu vakantie. Maduro a indica cu e compania a pidi pa rectifica, cual nan no a haci y a base die sey a hiba nan Corte. Den e caso aki, Maduro ta kere cu pueblo henter lo duna su sosten. “No ta solamente e miembronan tin cu paga pa e proyecto aki, pero ta pueblo completo tin cu bay paga pa e proyecto di miyones. Ta e pueblo henter mester bin corte.”
