Taxistanan ta preocupa cu cierto desaroyo riba waf. Nan no ta permiti pa pasa den un binnenweg pa  recoge esnan cu ta sali for di barconan crucero.

E ta net na e entrada di waf crucero. E siman aki a nota cu DOW a pone indicacionnan cu e ta destina solamente pa e personal di waf y e busnan di tour, for di 7’or di mainta pa 11’or di anochi. Linda Orman, Presidente di Taxi Unie, a expresa e preocupacion aki di su coleganan.

Awo e taxistanan no por drenta e pida aki. Nan tin cu pasa den e rij, p’asina nan por yega caminda cu nan tin cu yega. A busca contacto cu autoridad, a papia cu polis, esnan cu ta encarga cu e zona aki. Nan a bisa cu e borchi berdad a wordo poni, pero ainda e no ta na vigor. Cu otro palabra, taxistanan ainda por pasa eynan sin cu nan ta wordo sanciona, si haya nan. Polis lo tin cu bay haci un anuncio dos siman prome cu e drenta na vigor. Y e fecha pa anuncia esaki ainda no a yega.

Ainda taxista por pasa pero pronto ta prohibi pa taxistanan pasa den binnenweg na Waf Crucero

Posted by 24ora on Wednesday, September 18, 2019

Dicon

Motibo cu a bin cu e cambio aki, ta pasobra ta bay habri un porta nobo na e entrada di waf, pabao di esun actual. P’esey a bin cu tipo di cambioan aki y cu lo anuncia mas despues door di polis mes. Lo bay tin un entrada destina pa e tourbusnan so y e personal di waf. Taxistanan no mag di pasa despues cu e anuncio wordo haci. Esaki mester sosode, dos siman prome cu e drenta na vigor. Segun Orman, no tin fecha tampoco pa ki dia e anuncio aki ta tuma luga.

Aunke cu e taxistanan por pasa ainda sin cu nan ta sanciona, toch nan ta keda preocupa, pasobra nan ta bisa cu si resulta cu nan tin hendenan di Freewinds, cu ta un barco cu ta para eynan, pa recoge, nan ta pasa via porta pabao. Pero e porta pabou cierto momento ta cera. Nan ta preocupa pasobra ora e porta ta cera, nan lo mester pasa parti pariba. Pero con por haci esey si nan ta core riesgo di haya boet si nan pasa eynan (ora e borchi ta poni). Esaki ta preocupacionnan valido cu autoridad mester aclaria na momento cu haci tipo di cambionan aki. “Na momento cu e borchi drenta den funcion, e ta nifica cu e pida eynan, e indicacionnan aki ta haya forsa y lo anunci’e dos siman prome. Awo nan tin cu pasa den full e rij pa nan por yega nan destino.”

Comments

comments