No obstante cu Gabinete Wever-Croes a tuma mando dia 17 di november 2017, toch a tuma nan 8 luna pa haya candidatonan interesa pa drenta Hunta di Supervision di WEB Aruba N.V. Ta parce cu no a logra haya suficiente hende tampoco, pasobra tin mesun hende den mesun directiva di NV Elmar y WEB Aruba NV. Den caso di Water- en Energiebedrijf Aruba, a apunta mr. Jimmy Coutinho den funcion di Presidente di e Hunta di Supervision. Den su rol, e ta representa doño di e compania, esta Utilities Aruba N.V.
Jose Jimmy Coutinho ta naci na Aruba y tin 68 aña di edad. E ta un abogado conoci riba nos isla. El a studia ley di Aruba, di Antias y ley notarial na Universidad di Antias na añ 1983. Desde aña 1991 e ta maneha Coutinho & Co. Advocaten, situa den Kolibristraat den Simeon Antonio.
Separa di Jimmy Coutinho, a apunta otro miembronan tambe den e Hunta di Supervision, den persona di Filomeno “Shon No” Maduro, Serapio Wever, Leo Croes y Pierre Greaux. Den e 5 miembronan aki lo mester tene supervision riba gerencia di WEB, encabesa pa Luis Oduber y Randolph Ruiz.
