Despues di un proceso cu a cuminsa na april caba, cu lunanan di reunion, tanto virtual como presencial cu partnernan y stakeholdernan local y internacional, Aruba Tourism Authority (A.T.A.) a entrega su plan y presupuesto pa aña 2022 oficialmente na Minister di Turismo, Danguillaume Oduber. Esaki tabata e di 11 aña consecutivo cu e documentonan oficial a keda cla y aproba pa e Hunta di Supervision di A.T.A., segun ley ta prescribi prome cu dia 1 di september, pa consecuentemente su presentacion na Gobierno di Aruba tuma luga.
A pesar di e retonan cu e pandemia di COVID-19 a trece cu ne, Aruba ta experenciando desaroyonan hopi positivo den turismo y esaki ta refleha tambe den e presupuesto y e plannan pa aña 2022. Tin como un di e metanan principal pa yega na 95% di “stay-over visitor arrivals”, esta yegada di bishitantenan di estadia, compara cu 2019 cu tabata un aña record pa e isla.
Ronella Croes, CEO di Aruba Tourism Authority, a remarca cu e plan di Aruba ta ambicioso. “Mercadeo internacional ta keda un punto clave di prioridad pa A.T.A., pero sigur ta bay tin hopi proyecto cu ta bay yuda guia e desaroyo di producto turistico di Aruba,” Croes a agrega. El a remarca cu ta importante pa e fondonan ta disponibel pa ehecuta e plan manera el a keda presenta.
Algun ahustacion na e plan y presupuesto por ta necesario, pero A.T.A. ta sinti cu e ta den linea cu e vision y maneho di Ministerio di Turismo, manera mester ta. Un topico cu ta resalta den e plan ta e enfoke riba e desaroyo di un producto turistico duradero y pa cu esaki, por ehempel ta menciona entre otro un programa cu ta yuda coordina “visitor flow”, esta e presencia na diferente atraccion, cu ta yuda mehora e experiencia y pa e bishitante por disfruta.
Prome cu e entrega oficial, algun parti di e plannan ya a keda presenta na diferente ocacion, tanto na Minister Oduber, como riba Dia Internacional di Turismo y den e reunion a tuma tempo pa amplia riba diferente topico y e presupuesto naturalmente cu e mandatario.
Recuperacion y crecemento
Pa loke ta e cuater indicadornan principal nacional, pa 2022 tin como meta (compara cu 2019): 1. Un recuperacion di 95% di Stay-over Visitor Arrivals, bishitantenan di estadia; 2. Un recuperacion di “Tourism Credits” (gastonan cu e bishitante ta haci pa prepara pa su bishita y durante di su bishita) cu un minimo di 95%; 3. Crecemento di 3% di e Average Daily Rate (ADR) cu 3%; y 4. Recuperacion di turismo crucero entre 31% y 77%.
Tres Meta
A.T.A. a pone tres meta principal pa 2023: Subi e balor economico di turismo; posiciona Aruba como un destinacion deseabel y sostenibel y lidera posicionamento y desaroyo di Aruba como destinacion.
A identifica diferente obhetivo pa medio di cual lo traha pa yega e metanan aki. Entre otro ta menciona incrementa e envolvimento di comunidad di Aruba cu turismo y e mehoracion di e experiencia y envolvimento di e bishitante ora e ta na Aruba. Tambe lo traha riba e crecemento di e suma promedio cu e bishitante ta gasta na Aruba; Sigura turismo sostenibel, creando un balansa entre e necesidadnan di e comunidad, e bishitantenan y e destinacion y sigura preparacion pa reacciona efectivo den e caso cu un emergencia presenta.
E pandemia COVID-19 a cambia e scenario global completamente, strategianan pa loke ta e mercadeo y comunicacion den e diferente mercadonan a wordo revisa y ahusta. A tuma na cuenta con Aruba ta wordo profila/mercadea den exterior pa asina no perde e conexion cu bishitanantenan potential y tampoco cu esnan cu ya conoce Aruba caba.
Ta sigui enfoca primordial pa sigura loke ta buelonan aereo pa nos isla y pa sostene inversionnan den mercadeo pa loke ta Aruba su mercado mas importante cu ta Norte America. Adicionalmente, e strategia di Aruba pa diversifica e mercadonan Europeo y Latino America ta continua.
A.T.A. a demostra su habilidad pa guia y Aruba den su posicion como un destinacion y como tal e posicion aki a pone cu Aruba a disfruta di e beneficionan di e industria di turismo y su bishitantenan. Ta sigui traha enfocando riba tres meta clave pa e siguiente tres añanan delinea den “Our Tourism 2025 Aspiration”, esta innovacion, sostenibilidad y liderazgo.
