Gerencia di Arutram ta informa comunidad cu entrante 7 di december 2020 (awe) te cu 05 di januari 2021, tramnan di Arutram no lo ta den funcionamento.
Gerencia a tuma e decision aki teniendo na cuenta cu e mercado principal di Arutram, esta turismo crucero no ta activo ainda. Saliendo for di e punto aki, a probecha e situacion pa por finalisa acuerdonan interno cu sindicato y trahadonan, teniendo semper na cuenta bienestar di compania y trahadonan.
Na mesun momento ta informa cu trahadonan di Arutram a uni y a dicidi di haci un gesto pa yuda comunidad. Alvin Cornett a presenta un iniciativa pa trahadonan di Arutram contribui den forma boluntario cu loke nan por y asina logra yega na un bunita suma pa haci un donacion na un instancia caritativo.
Mirando e trabounan grandi cu Fundacion Pa Nos Comunidad a bin ta haciendo, specialmente den e temporada di crisis di Covid, a dicidi pa haci e donacion na e fundacion aki y asina contribui cu nos comunidad den e dianan di fiesta venidero.
Mayoria di trahado a contribui cu loke nan tabata por, demostrando asina nan sentimento di solidaridad y convivencia cu esnan cu ta pasando den dificultad.
Asina a logra cera un suma y gerencia di Arutram a uni su mes na e gesto aki contribuyendo tambe pa cera un bunita suma cu a wordo entrega na Veronica y Liandro, representantenan di Fundacion Pa Nos Comunidad, door di Alvin Cornett acompaña pa director Edwin Mohamed.
Trahadonan di Arutram ta spera cu e suma aki por contribui na yuda famianan di Aruba pasa miho dianan di Pasco y na mes momento ta desea pueblo henter un Bon Pasco y un Prospero Aña Nobo.
