Recientemente a lansa e website www.labhoh.org completamente remodela y den un bachi nobo, haciendo e mas atractivo pa comunidad y yena di informacion importante. Den pasado e tabata na Hulandes y awo e ta na Ingles, p’asina como organisacion por yega na mas hende.
A present’e n’e team completo y hunto a admira e producto final cu durante e lunanan largo a traha riba dje. Informacion corecto ta esencial y ki miho manera pa tin e den bo plant’i man. Esaki tabata un esfuerso di un team completo cu awe por mira bek y ta orguyoso di e producto final. E website nobo ta consisti di diferente ‘tabs, unda como bishitante di website bo ta yega mas lihe na e informacion desea. Sea ta pa pashent buscando informacion pero tambe pa dunadonan di cuido tin un ‘tab’ apart, como tambe pa e companianan cu mester di informacion tocante LabHOH su servicionan. Pues un ‘look’ mas moderno, super accesibel y alabes ‘mobile friendly’.
“Por ehempel, un pashent por bay riba e tab di pashent, pa haya sa kico tur e mester haci of kico e tin mester ora e tin cu bini LabHOH pa un test”, asina Cyrielle Laclé- Diaz a conta. Alabes pa purba di contesta e preguntanan mas haci di pashent a traha un ‘tab’ cu ‘frequently asked questions’. Pa e dunadonan di cuido tin e tan conoci ‘vademecum’ cu ta sumamente util na momento cu mester sa mas informacion tocante un test, por ehempel cuanto dia ta dura pa ricibi e resultadonan y mucho mas.
Tambe a pone informacion di e diferente departamentonan di LabHOH y te hasta dunadonan di cuido por download formulario pa yena y manda pa LabHOH.
Directiva ta gradici henter e ekipo di LabHOH cu a yuda y traha duro pa renoba e website cu tur informacion cu enfoke pa mehora servicio n’e cliente- y dunadonan di cuido. Por ultimo, ta invita publico pa subi e website di www.labhoh.org ora di cualkier cita of djis pa cera conoci di cerca cu e servicionan cu LabHOH ta brinda.
