Recientemente Minister Glenbert Croes a honra Clarette Quandus, cu a cumpli 25 aña den servicio di Gobierno di Aruba. Clarette no ta un cara desconoci riba nos isla mirando cu e ta un poeta. Algun di su coleccionnan di poesia ta inclui ‘Mi Aruba, mi prohimo, mi inspiracion’ (1998), ‘Amor y fe’ (2006), ‘Kibrando e silencio’ (2011) y Elegante Poeta (2019).
Clarette a cuminsa traha pa Gobierno dia 1 di december 1998, pues el a brinda 25 aña di su bida na sirbi su pais. Glenbert Croes, Minister di Labor, tabatin e privilegio di dun’e su debido reconocemento pa su servicio den Gobierno.
Pa Minister Glenbert Croes ta masha importante pa reconoce y balora nos icononan cultural y artistico mientras cu nan ta na bida. Dunando e tipo di reconocementonan aki ta spera cu por inspira nan pa sigui ta un ehempel den nan bida artistico pero tambe den nan trabou como sirbido di Gobierno.
