Awe merdia hues-comisario a tuma un decision riba peticion di fiscal di Ministerio Publico, relaciona cu detencion di parlamentario Benny Sevinger. E magistrado, despues di a evalua e pruebanan cu husticia tin riba mesa, e status di e investigacion y e necesidad pa wanta e sospechoso leu for di otro partidonan envolvi den e investigacion, a dicidi pa bay di acuerdo cu peticion di e fiscal pa alarga e detencion di Benny Sevinger cu 16 dia mas.
Manera ta conoci, diarason dia 26 di mei ultimo a detene e parlamentario den oranan di mainta. E tabata bebiendo koffie cu algun amigo ora cu polisnan di Landrecherche a yega cerca dje y a deten’e na e sitio mes. Despues nan a bay su cas y eynan a detene su casa Claudia Sevinger.
Cu e decision awe di hues-comisario, husticia a haya luz berde pa tene e parlamentario, alabes candidato # 29 riba lista di AVP encarcela te cu diasabra 19 di juni. E ora ey ta apenas 6 dia prome cu eleccion. Pa e dia ey lo mester tuma un decision si ta lag’e den libertad of ta prolong’e atrobe cu un maximo di 60 dia mas.
E PROCESO PENAL
Ta bon pa splica cu na momento di detene un sospechoso, e prome dos dianan y e prome prolongacion di ocho dia, pa yega dies dia, yama “in verzekering”. Despues di esey, ta sigui un proceso di “in bewaring” cu por bay dos bes ocho dia atrobe. Y despues di e 16 dianan di detencion, fiscal por pidi pa prolonga e detencion cu 60 dia mas, den e proceso conoci como “in gevangen houding”. Despues di e dianan ey cera den KIA, ainda fiscal por pidi prolongacion di 30 dia mas den e mesun proceso. Ta bon pa menciona cu e prome dies dianan ta cera den cel na un ward’i polis mientras cu despues di esey ta bay KIA. Na tur ta papia di 116 dia di encarcelacion prome cu e caso presenta dilanti un hues. Despues di e 116 dianan si e sospechoso mester presenta dilanti un hues, sea pa e caso mes of den e proceso yama como “pro forma”.
HUSTICIA KIER WANTA BENNY SEVINGER CERA POR LO PRONTO
Awe fiscal Gerritsen, durante e procedura penal dilanti hues-comisario, a anuncia caba na e magistrado cu ta su intencion pa mantene e parlamentario cera te dia su caso bin padilanti. Esey ta nifica cu husticia ta planea pa bay henter e 116 dianan di encarcelacion prome cu Benny Sevinger yega dilanti un hues pa e defende su mes. Ta acusa e parlamentario di e.o. soborno di un ambtenaar, falsificacion di firma y di lo ta forma parti di un organisacion criminal.
SOSPECHOSONAN DEN LIBERTAD
Den e caso aki tabatin varios persona deteni, cu a sali liber. Nan ta entre otro Rebecca Richardson, su mama Leoncita Arends, Franklin Abath, Freddy Every, Jeff Franken, Gaby Werleman y su casa Ninosca Nuñez, Mary Hsing y por ultimo e casa di Benny Sevinger mes, Claudia Sevinger, kende dia 29 di mei ultimo a sali liber.
E CASO AVESTRUZ
Ministerio Publico a informa dia 2 di october 2019, dia cu a haci e entradanan hudicial, cu Landsrecherche hunto cu hues-comisario y den cooperacion cu Cuerpo Policial di Aruba, ta investigando posibel delitonan di corupcion y otro hechonan castigabel, posiblemente cometi relaciona cu otorgamento di terenonan di gobierno. Mas concretamente: E investigacion ta dirigi riba e pregunta cu si un of mas compania a obtene, a base robes, (un opcion riba) derechonan di erfpacht di terenonan di pais Aruba den e añanan 2009 te 2017.
TOCANTE BENNY SEVINGER
Oslin Benito Sevinger, miho conoci como Benny, di 56 aña di edad, un karateka, a subi lista di partido AVP den eleccion di aña 2001. Prome cu esey e tabata traha como consehero di Minister Watty Vos (qepd) y ora cu e ultimo aki a fayece na 2001, a dicidi di pone Sevinger riba lista, den representacion di “e hendenan di Watty”. Su carera tabata semper impresionante.
- Eleccion 2001 – 1493 voto
- Eleccion 2005 – 1403 voto
- Eleccion 2009 – 2072 voto
- Eleccion 2013 – 3932 voto
- Eleccion 2017 – 2785 voto
Benny Sevinger ta casa di Claudia y tin dos yiu, Stephany y Brain. Bou su maneho, a desaroya proyectonan historico pa nos pais, manera ta renobacion di aeropuerto, hospital, Green Corridor, ringweg 3 esta Watty Vos Boulevard y tambe e proyecto di renobacion y embeyecimento di centro di Oranjestad, cu a inclui adkisicion di un tram.
